وفاقی وزیر تجارت جام کمال خان برطانیہ ءِ سرکاری تر ءُ تاب ءَ روادگ بوت

اسلام آباد۔13جولائی (اے پی پی): وفاقی وزیر تجارت جام کمال خان برطانیہ ءِ سرکاری تر ءُ تاب ءَ شتگ۔ تر ءُ تاب ءِ ساھت ءَ پاکستان ءُ برطانیہ ءِ بیپاری سیادی آنی تہ ءَ ھاسیں پیشرفت ءِ امیت انت۔ یک شمبے ءِ روچ ءَ وزارت تجارت ءِ نیمگ ءَ جاڑی بوتگیں بیان ءِ رد ءَ وتی تر ءُ تاب ءِ ساھت ءَ وزیر تجارت ءَ پاک ءُ برطانیہ ءِ نیام ءَ تجارتی گپ ءُ تران ءِ ٹو آر آنی سر ءَ دستخط کنگ ءُ آل پارٹی پارلیمانی گروپ ءَ گوں ھم گند ءُ نند کنگ ءِ جار جنگ بوتگ۔ ایشی ءَ ابید آ لندن ءُ برمنگھم ءِ چیمبرز آف کامرس ءِ گوما تجارتی سیادی ءِ بابت ءَ ھم گپ ءُ تران کنت۔ ھمے رنگ ءَ برطانیہ ءِ تر ءُ تاب ءِ ساھت ءَ وزیر کامرس برطانیہ ءِ ملٹی ملین ڈالر ءِ مزنیں کمپنی آنی مزنیں کارندہ آں گوں ھم گند ءُ نند کنت، ایشی ءِ تہ ءَ فوڈ، آئی ٹی، انجینئرنگ ءُ فن ٹیک ءِ شوبگ آنی تہ ءَ سرمایہ کاری ءَ را دیمروئی دیگ ءِ ھوالگ ءَ گپ ءُ تران کنگ بیت۔ ایشی ءَ ابید پاکستان ءُ برطانیہ ءِ بزنس کونسل آنی گوما گند ءُ نند ءِ امیت انت کہ ایشی ءِ تہ ءَ ادارگی کمک ءِ بابت ءَ گپ ءُ تران کنگ بیت۔ زانگ بہ بیت وزیر تجارت ءِ تر ءُ تاب ءِ مول ءُ مراد برآمدات ءَ را دیمروئی دیگ ءُ پاکستانی مصنوعات ءَ را جہانی مارکیٹ آنی تہ ءَ رسگ ءِ واستہ گیش موثر جوڑ کنگ انت۔