جہانی برادری بھارتی بیان بازی، علاقائی سوگوی و دیرپاامن نا گمان تے نسخان تننگ نا سنجیدگی اٹ نوٹس ءِ ہلے، ترجمان دفترخارجہ

اسلام آباد ۔ 27 مئی (اے پی پی) پاکستان وزیراعظم نریندر مودی نا ساڑی آ بیان نا نوٹس ءِ ہلسا پارینے کہ جوہری سلہہ تخوک آ ریاست نا راہشون نا حیثیت اٹ بھارتی وزیراعظم آن سنجیدگی نا اومیت بایدے کننگے ولے او اونا جاگہ غا گجرات اٹی ریلی آن تینا تران اٹی ولدا راگ بازی کرے، بھارتی وزیراعظم نا کنڈآن داوخت آ بیدادی آ تالان خارتس بیان نئے بیرہ تینا مواد بلکن داسوب آن ہم تشویشناک ءِ کہ دا ڈیہہ اٹی مہالو آن ساڑی نزوری نا حالیت آتیٹی اسہ پین خطرناک ءُ درور اسے۔ بھارتی سرکڑدہ نا کنڈآن سنجیدگی و معقولیت اٹ چرجوئی اتون گریز افسوزناک ءِ۔ ترجمان دفترخارجہ نا کنڈآن سے شنبے نادے آ داڑے جاری بیان اٹی پاننگانے کہ جہانی برادری بھارت نا کنڈآن خارتس بیان بازی ٹی ودکی، علاقائی سوگوی و دیرپاامن نا گمان تے نسخان تننگ نا سنجیدگی اٹ نوٹس ءِ ہلے۔ بیان اٹی بھارتی وزیراعظم نا خارتس بیان آ سخت ردعمل نا درشانی ءِ کرسا اودے گچین کاری مہم اٹی خلوک آ ٹیرتکائی گوندنگانے، ترجمان پارے کہ جوہری سلہہ تخوک آ ریاست نا راہشون آن دانا اومیت کننگ مفک۔ بھارتی وزیراعظم نا بیان اٹی خار آ تالان بیدادی نا سلہ بے کچ تشویشناک ءِ، انتئے کہ ڈیہہ اٹی حالیت آک مہالوآن خطرناک ءُ۔ ترجمان پارے کہ داوڑنا بیان اقوام متحدہ نا چارٹر نا بنداوی اصول آتا اسُل خلاف ورزی ءِ ہراباسک ملک آتے جھیڑہ غاتے پرامن وڑاٹ ایسر کننگ و ایلو ریاست آتا وتواجہی یا سیاسی آجوئی نا برخلاف دھڑکو یا واک انا کاریم اٹ اتنگ آن باز سلنگ نا پابند کیک۔ اوپارے کہ پاکستان بھارتی وزیراعظم نا دابیان ءِ اسہ اشتعال انگیزی نا وڑاٹ ہرک ہرانا مسخت بھارت نا غیرکانودی کوزہ ٹی جموں و کشمیر اٹی برجاانسانی حق انا خلاف ورزی و آبادیاتی انجینئرنگ آن چکار ءِ اسہ کنڈ کننگ ءِ۔ بیان اٹی پاننگانے کہ اقوام متحدہ نا امن اٹی سرکڑدہ شریدار نا وڑاٹ پاکستان نا ریکارڈ و انسداد دہشت گردی نا جہانی کوشست آتیٹی اونا پدریسہ کمکاری مخالف توار اسے آن زیات بڑز ءِ۔ ترجمان پارے کہ اگہ انتہاپسندی واقعتا بھارتی حکومت کن گڑتی نا سوب ءِ تو دا جوان مریک کہ او داہیت انا جاچ ءِ ہلے کہ بھارت اٹی بیرہ اکثریت پسندی(گیشتر کچ انا بنداو آ فیصلہ غاتا رجحان) ، مذہبی بے سگی و سفاکانہ ہندوتوا نظریہ نا رداٹ اقلیت آتے منظم وڑاٹ شست کننگ انگ ءِ۔ اوپارے کہ پاکستان تین پہ تینی شرف و وتواجہ بریبری آ تالان امن کن سنبرینگوک ءِ۔ ولے اقوام متحدہ نا چارٹر نا آرٹیکل 51 نا رداٹ او تینا سلامتی یا علاقائی سالمیت کن ہرخطرہ نا مقابلہ ءِ سوگو و متناسب گام گیج آتون کیک۔ ترجمان پارے کہ جہانی برادری  بھارت نا ودوک آ بیان بازی نا سنجیدگی اٹ بایدے نوٹس ءِ ہلے انتئے کہ دا علاقائی سوگوی و دیرپاامن نا گمان تیکن نسخان دہ ءِ۔