تہران۔26مئی (اے پی پی):مزن وزیر محمد شہباز شریف ایران ءِ بنجاھی شہر تہران ءَ پج اتگ۔ مہرآباد بالی پٹ ءَ سر بوھگ ءَ پد ایران ءِ تہی کارانی وزیر سکندر مومنی، پاکستان ءَ ایران ءِ سفیر رضا امیری مقدم، ایران ءَ پاکستان ءِ سفیر مدثر ٹیپو ءُ مزنیں سفارتی کارندہ آں مزن وزیر شہباز شریف ءُ پاکستانی ڈل ءَ را وش اتک کت۔ دوشمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءَ را مھر آباد بالی پٹ ءَ ایرانی اُرد ءِ جوانیں پوشاکیں دستہ ءَ سلام داتگ۔ نائب مزن وزیر ءُ درئی کارانی وزیر محمد اسحاق ڈار ، چیف آف آرمی اسٹاف فیلڈ مارشل سید عاصم منیر، وفاقی تہی کارانی وزیر سید محسن رضا نقوی، وفاقی وزیر ءِ اھوالکاری عطا اللہ تارڑ ءُ ھاسیں کمکار سید طارق فاطمی مزن وزیر ءِ ایران ءِ تر ءُ تاب ءِ ھمراھی ءَ ڈل ءِ بھر اَنت۔ تر ءُ تاب ءِ وھد ءَ مزن وزیر محمد شہباز شریف ایران ءِ صدر ڈاکٹر مسعود پزشکیان ءَ گوں گند ءُ نند ءِ واستہ تہران ءِ محل سعد آباد ءَ روت، اودا آئی ءَ را گارڈ آف آنر پیش کنگ بیت۔ ایشی ءَ پد مزن وزیر ءُ پاکستانی ڈل ایران ءِ صدر ءُ آئی ءِ ڈل ءَ گوں گند ءُ نند کنت، ایشی ءِ تہ ءَ مزن وزیر دوئیں ملک آنی نیام ءَ دو نیمگی کمک ءَ را دیمروئی دیگ ءِ ھاترا، بھارت ءِ نیمگ ءَ پاکستان ءِ سر ءَ مسلط کتگیں گوستگیں جنگ ءَ پاکستان ءِ کمک کنگ ءُ جنوبی ایشیا ءَ ایمنی ءِ واستہ کوشست کنگ ءِ ھاترا ایران ءِ صدر ءُ الس ءِ منت ءَ گپت کنت۔ مزن وزیر ءُ پاکستانی ڈل ایران ءِ سپریم لیڈر آیت اللہ سید علی خایمنی ءَ گوں گند ءُ نند ءَ دو نیمگی جیڈھ آنی ھوار ھاسیں دمگی جیڈھ آنی سر ءَ ھم گپ ءُ تران کن اَنت۔ مزن وزیر ءُ پاکستانی ڈل ایران ءِ صدر ڈاکٹر مسعود پزشکیان ءِ میزبانی ءَ شپ ءِ ورگ ءَ ھم بھر زور اَنت۔
