اسلام آباد۔ 26 مئی (اے پی پی) پاکستان و ایشیائی شونداری بینک انا نیام اٹ موسمیاتی لچک و چاگڑدی پائیداری نا مون آ دننگ کن تین پہ تینی شریداری آ امنا کننگانے۔ وزارت موسمیاتی بدلی و چاگڑدی رابطہ نا کنڈآن جاری بیان نا رداٹ بنجائی وزیر موسمیاتی بدلی ڈاکٹر مصدق ملک تون ایشیائی شونداری بینک انا ڈائریکٹر جنرل برونوکاراسکو بڑزکو کہولی ڈل اتون اوار اوڑدہی کرے۔ اوڑدہی نا مسخت پاکستان اٹ موسمیاتی ریزیلینس و چاگڑدی سوگوی نا بابت تین پہ تینی کمکاری ءِ مون آ دننگ ئس۔ فریق آک موسمیاتی بدلی آن مون تروک چیلنج آتون مون تننگ کن اسہ جوان، دوراندیش و بھرمی حکمت عملی اس تینا کننگ نا گرج آ زور شاغار۔ دارداٹ اسہ اسیجائی قومی حکمت عملی و موسمیاتی پالیسی فریم ورک انا ٹہیفنگ آ امنائی سلاہ خننگا تانکہ پاکستان نا چاگڑدی ریزیلیئنس اٹی گچین ودکیءِ ممکن کننگ مرے۔ دیوان اٹی ورناتا کماشی ٹی موسمیاتی گام گیج آتے سوگوی تننگ آہم سرجمی اٹ گپ وتران مس ہرانا رداٹ ورناتے انکیوبیشن ، مالی کمک و راہشونی نا آسراتی فراوان کننگک تانکہ او داوڑنا ڈٹ آتے ٹہیفنگ کیر ہرانئے بیرہ چاگڑد دوست مریر بلکن جہانی کہول آ مسابقتی حیثیت ہم تخر۔ موسمیاتی مالیات، اسیجائی ڈٹ جات و زرکاری نا بابت امور آہم شرہ مس تانکہ پائیدار شونداری نا ہدف آتا دوئی کننگ کن وافر وسیلہ غاتا دوئی کننگ ءِ پک کننگ مرے۔ بنجائی وزیر ڈاکٹر مصدق ملک داہیت آ زور شاغا کہ بیرہ ڈٹ بندی گنج اس اف بلکن عملی گام گیج و اونا گچین نفاذ کن غٹ تعلقدار فریق آتا ہم گرنچی المی ءِ۔ اوداوخت آ ایشیائی شونداری بینک اتون ہر ریسہ غا پورو کمکاری نا باوری کرفے تانکہ طے مروک ہدف آتے گچین وڑاٹ ایسر اسکان سرکننگ مرے۔ فریق آک کاربن کریڈٹ نا بنداو آ شریداری نا گمان تاہم جاچ ءِ ہلکر ہرانا مسخت چاگڑدی کارکڑد و خڑچ آتیٹی کمتی نا بھرم تے مالی اعتبار اٹ قابل قدر کننگ ءِ۔ تین پہ تینی علمی ڈٹ جات، موسمیاتی پالیسی آ تالان وام تا آسراتی، لائخی سازی آ تالان ورکشاپ و السی آگاہی مہم تا اڈتننگ آہم امنا کننگا تانکہ ادارہ جاتی کاریم نا کچ اٹی ودکی و قومی کہول آ موسمیاتی شعور نا شون تننگ ءِ ممکن کننگ مرے۔
