اسلام آباد۔ 26 مئی (اے پی پی) وزیرریلوائی محمد حنیف عباسی تون پاکستان اٹی سعودی عرب نا سفیر نواف بن سعید احمد المالکی اوڑدہی کرے ہراٹی تین پہ تینی است خواہی نا امور تیا گپ وتران کننگا۔ وزیرریلوائی محمد حنیف عباسی و سعودی سفیر پاکستان و سعودی عرب نا تعلقداری تے سوگو کننگ آ زور شاغا۔ اوڑدہی ٹی ہڑتوم آ کنڈآتا کمکاری و زرکاری نا وارخواہی تیا سرجمی اٹ گپ وتران مس۔ حنیف عباسی پارے کہ پاکستان و سعودی عرب نا تعلق اسہ عظیم ایلمی و اسیجائی فائدہ غاتیا تالان ءِ۔ وزیرریلوائی سعودی عرب تون ریلوائی نا بشخ اٹی کمکاری ءِ ودفنگ نا است خواہی ظاہر کرے۔ اوپارے کہ پاکستان و سعودی عرب نا تاریخی، مذہبی واقتصادی تعلقداری سوگو بنداوتیاٹی ءُ، سعودی عرب اٹی لکھ آ پاکستانی مزور آتا ریمیٹنس پاکستان نا زرگزران نا اہم ءُ بشخ اسے، ہرسال لکھ آ پاکستانی حج و عمرہ کننگ نا کمک اٹ ہڑتوم آ ملک آتا خڑکی رابطہ غاتا نشانی ءِ۔ وزیرریلوائی ، ریلوائی سیکٹر اٹی کمکاری، زرکاری و واپاری تعلقداری تے ودفنگ آ زور شاغا۔ داوخت آ پاکستان و سعودی عرب نا متکن آ تعلقداری تے پین سوگو کننگ کن اسیجائی کوشست آتیا امنا کننگا۔ اوپارے کہ سعودی عرب پاکستان نا اہم شریدار ءِ، تعلقداری تے پوسکن آ بڑزی تسکان دننگ المی ءِ۔ اوڑدہی ٹی ہڑتوم آملک آتا الس نا راجی آسودہی کن اسیجائی ڈٹ آتیا گپ وتران کننگا۔ وزیرریلوائی سعودی سفیر ءِ پاکستان اٹ زرکاری نا سلہ خلک۔ سعودی سفیر پاکستان نا شونداری و ہڑتوم آ کنڈآتا کمکاری ٹی است خواہی نا درشانی ءِ کرے۔ محمد حنیف عباسی پارے کہ پاکستان سعودی عرب تون ہربشخ اٹی خڑکی کمکاری خواہک۔
