اسلام آباد۔ 26 مئی (اے پی پی) بنجائی وزیر خزانہ ومحصولات سینیٹر محمد اورنگزیب پارینے کہ شفافیت ءِ پک کننگ و خراج دُزی نا توننگ اٹ ڈیجیٹلائزیشن نا کڑد بھازاہمیت تخک، تنخواہ دار تپہ کن خراج ریٹرن فائل کننگ ءِ آسان کننگ انگ ءِ، برجامالی سال اٹی وام تا واپسی ٹی اسہ ٹریلین روپئی نا کمتی مس، بروک آمالی سال اٹی ڈیبٹ مینجمنٹ آفس ءِ پوسکن آ وڑتتون ہم گرنچ کننگک، ملک ہموتم شون ہلیک ہراتم خراج نا اہل بندغ آک تینا خراج ءِ وخت آ ایترہ۔ دوشنبے نادے آ داڑے کارانداز پاکستان و پاکستان بینک ایسوسی ایشن نا کنڈآن اڈ ہلوک دود آن تران کرسا وزیرخزانہ پارے کہ تدوک آ منہ ہفتہ ٹی اندرون و بیرون ملک پاکستان نا ہڑتوم آکنڈآتا و کثیرالجہتی شریدار، سنگت ملک آتا وزراء خزانہ، و زرکارآتون اونا اوڑدہی مس، دا اوڑدہی تیان ننے اِرا پیدوار کلہو ملانے، اولیکو داکہ ہڑتوم آ کنڈآتا و کثیر الجہتی شریدار، سنگت ملک آتا وزراء خزانہ و زرکارپاکستان نا اقتصادی و زرگزرانی گچینی و آجو زرگزران نا سوگوی آن است جم ءُ، او اقتصادی سوگوی خاص وڑاٹ پالیسی ریٹ و کبینی ٹی کمتی و زرگزرانی ٹک آتیٹی گچینی نا رفتار نا ہم ستاءِ کننگ ءُ، اونا ارٹ میکو کلہو دادے کہ پاکستان ءِ پالیسی تا چرجوئی ءِ برقرار تخوئی مریک، پاکستان تدوک آ سال و تدوک آ دہائی ٹی ہم زرگزرانی سوگوی دوئی کریسس ولے اودے برقرارتخنگ متو ، ننے داسہ شیف و بڑزی نا چکر ءِ چٹفوئی مریک، داڑکن پنجرجاتی اصلاحات نا عمل نا بناءِ کننگانے، خراج نا بابت مخلوق، پراسیس و ٹیکنالوجی آ چکار کننگ انگ ءِ، ایف بی آر نا پورو ڈیجیٹلائزیشن کننگ انگ ءِ، ہراٹی نجی بشخ قائدانہ کڑد ادا کننگ ءِ۔ پرال بورڈ انا چیئرمین و زیات تر باسک آتا تعلق نجی بشخ اتون ءِ، ایف بی آر نا ٹرانسفرمیشن اٹی کارانداز نا کڑد ہم ستاکڑزک۔ وزیرخزانہ پارے کہ شفافیت ءِ پک کننگ و خراج دُزی نا توننگ اٹ ڈیجیٹلائزیشن نا کڑد اہمیت تخک ، داڑتون اوار اوار خراج نا عمل ءِ آسان کننگ آ چکار کننگ انگ ءِ، تنخواہ دار تپہ کن خراج ریٹرن فائل کننگ ءِ آسان کننگ انگ ءِ۔
