اسلام آباد۔23مئی (اے پی پی): پاکستان ءَ برکینا فاسو ءِ نامینتگیں سفیر محمدی کابورے ءَ جمعہ ءِ روچ ءَ تجارت ءِ وزیر جام کمال خان ءَ گوں وتی کارگس ءَ گند ءُ نند کت۔ اے آئی ءِ پاکستان ءِ اولی سرکاری تر ءُ تاب ات۔ سفیر کابورے تہران ءَ جاہ منند اِنت ءُ اودا چہ پاکستان ءِ سفارتی نمائندہ ءِ بستار ءَ کار کنگ ءَ اِنت۔ گند ءُ نند ءِ ساھت ءَ دوئیں نیمگ ءَ وت مہ وتی تجارتی ءُ اقتصادی کمک ءَ را گیش مھکم کنگ ءِ راہ آنی سر ءَ ھیال ریچی کنگ بوت۔ سفیر کابورے ءَ پاکستان ءَ برکینا فاسو ءِ دائمی سفارتی مشن ءِ جوڑ کنگ ءِ واھشت ءِ درشانی کت ایشی ءَ چہ پدر بیت کہ برکینا فاسو اسلام آباد ءِ گوما وتی سیادی ءَ را گیش گہتر کنگ ءِ واھشت مند اِنت۔ وزیر ءَ برکینا فاسو ءِ سفیر ءَ را دعوت دات کہ آ اگست ءَ کراچی ءَ برجم دارگ بوھوکیں فوڈ اے جی نمائش ءَ بھر زوری ءِ واستہ پاکستان ءَ کاروباری ڈل ءَ روان بہ دنت۔ آئی ءَ گوشت کہ اے رنگیں تبادلہ دوئیں ملک آنی نیام ءَ کمکی ءُ تجارت ءِ نوکیں موہ پیداک کنگ ءَ مزنیں کرد ءِ پیلو کن اَنت۔ گند ءُ نند ءِ ساھت ءَ سفیر کابورے ءَ وتی ھمکار ءِ نیمگ ءَ چہ نیکیں واھگ آناں سر کت ءُ وزیر تجارت ءَ را برکینا فاسو ءِ تر ءُ تاب ءِ دعوت دات۔ آئی ءَ پاکستان ءَ را ھم دزبندی کتگ کہ آ 7جون ءَ چہ 11جون ءَ برکینا فاسو ءَ برجم دارگ بوھوکیں بزنس فورم ءَ بھر زوری بہ کنت کہ ایشی ءِ برجم دارگ تجارتی موہ ءُ شریکداری ءِ دیمروئی ءِ واستہ کنگ بوھگ ءَ اِنت۔ کمیں وھد ءِ سر ءَ دلگوش کنان ءَ وزیر تجارت ءَ دل یکیمی دات کہ پاکستانی کاروباری نمائندگ آناں روان دیگ ءِ واستہ ھمک رنگ ءِ کوشست کنگ بیت، اگاں جون ءَ بھر زوری بوت نہ کنت گڈا پد ءَ جتاھیں تجارتی ڈل دیم دیگ بیت۔ جام کمال خان ءَ گوشت کہ دوئیں ملک آنی نیام ءَ استیں تجارتی کساس ناکافی انت ایشی ءِ تہ ءَ گیشی ءِ واستہ نوکیں شوبگ آنی شوھازگ المی انت۔ آئی ءَ گوشت کہ پاکستان افریقہ ءِ ملک آناں کم ھرچ ءِ ٹریکٹر ءُ کشت ءُ کشاری مشینری برآمد کنگ ءَ انت ءُ برکینا فاسو ءِ گوما ھم اے رنگیں کمک ءِ واستہ مزنیں گنجائش است انت۔
