اسلام آباد۔22مئی (اے پی پی): وفاقی وزیر خزانہ ءُ ریونیو سینیٹر محمد اورنگزیب ءَ اوورسیز سرمایہ کار چیمبر آف کامرس اینڈ انڈسٹری ءِ گوستگیں سروے ءِ آسر آناں وش اتک کتگ ءُ گوشت کہ اے سروے پاکستان ءِ معیشت ءِ سر ءَ سرمایہ کار آنی دل یکیمی ءِ درشان اِنت۔ سروے ءِ آسر استحکام ءِ نیمگ ءَ دیمروئی کنوکیں سفر ءِ درشان انت۔ حکومت جندی شعبہ ءِ دیمروئی ءُ دراجیں مدت ءِ اقتصادی استحکام ءِ ھاتر ءَ جزم انت۔ آئی ءَ اے گپ پنچ شمبے ءِ روچ ءَ اوورسیز انویسٹرز چیمبر آف کامرس اینڈ انڈسٹری ءِ ڈل ءَ گوں گند ءُ نند ءَ کت۔ اے ڈل ءِ سروکی ءَ صدر ءِ مملکت یوسف حسین ءَ کتگ ات۔ دیوان ءَ او آئی سی سی ءِ کاروباری اعتماد ءِ انڈیکس سروے – ویو 27 ءِ نوکیں آسر آنی سر ءَ تران کنگ بوت کہ مارچ ءُ اپریل 2025ءَ سرجمیں ملک ءَ کنگ بوتگ۔ایو سی سی ءِ ڈل ءَ سروے ءِ تفصیل پیش کتگ، ایشی ءِ رد ءَ کاروباری اعتماد ءِ تہ ءَ مزنیں گہتری بوتگ ءُ پاکستان ءِ کاروباری اعتماد ءِ تہ ءَ مزنیں کساسے ءَ گیشی بوتگ۔ کہ پیسریگیں سروے (اکتوبر نومبر 2024) ءَ منفی 5 درسد بوتگ ات، ءُ نوں 11 درسد ءَ مثبت بوتگ۔ اے گہتری ءِ سبب اقتصادی استحکام، مہنگائی ءِ کمی، ءُ آیوکیں وھد ءَ کاروباری جاور ھال آنی گہتری ءِ توقعات ءِ سبب ءَ گشگ بوھگ ءَ انت۔ مزنیں گہتری مینوفیکچرنگ ءِ شوبگ ءَ بوتگ کہ اودا کاروباری اعتماد منفی 3درسد ءَ چہ مثبت 15درسد ءَ سر بوتگ۔ خوردہ ءُ ہول سیل ءِ شعبہ ءَ ہم مزنیں ریکوری بوتگ کہ گوستگیں رند ءَ منفی 18درسد بوتگ ءُ نوں 2درسد ءَ مثبت بوتگ۔ سروسز سیکٹر ءَ ھم مھکمیں گہتری گندگ بوتگ کہ ایشی ءِ تہ ءَ اعتماد ءِ شرح 2درسد ءَ چہ 10درسد ءَ سر بوتگ۔ وزیر ءِ ھزانگ ءَ کاروباری جذبات ءِ جوانیں رجحان ءَ را وش اتک کنان ءَ گوشت کہ اے اقتصادی استحکام ءِ نیمگ ءَ پاکستان ءِ برجاھیں سفر ءِ آدینک انت۔ آئی ءَ سرمایہ کاری ءِ واستہ جوانیں چاگرد ءِ برجائی ءِ سر ءَ زور پر دات ءُ گوشت کہ حکومت جندی شوبگ ءِ دیمروئی ءُ دراجیں مدت ءِ اقتصادی برجائی ءِ واستہ جزمیگ انت۔ او آئی سی سی ءِ صدر یوسف حسین ءَ گوشت کہ گوستگیں دو سال آنی تہ ءَ کاروباری بھروسہ ءِ تہ ءَ مدام گہتری اتکگ ءُ انوگیں گیشی اے گپ ءِ ثبوت اِنت کہ پاکستان ءِ کاروباری براتی آیوکیں دیمروئی ءِ آسر آنی سر ءَ اُمیت وار اِنت۔ آئی ءَ گوشت کہ سروے ءِ آسر حکومت ءِ اقتصادی رھشونی ءُ اصلاحات ءِ گامگیج آنی سر ءَ گیش بوھوکیں اعتماد ءِ درشان ءَ کن اَنت۔ وزیر خزانہ ءَ دل یکیمی دات کہ حکومت اے جوانیں رجحان ءِ برجائی ءِ واستہ ھمک رنگ ءِ گامگیج ءَ برجاہ دار ایت۔ پالیسی ءِ تسلسل، شفافیت، ءُ او آئی سی سی ءِ باسکاں ھوار اسٹیک ہولڈر آنی گوما موثر ھوار بوھگ سرمایہ کار آنی اعتماد ءَ را گیش مھکم کنگ ءُ معیشت ءَ را یک مھکمیں بنیات ءِ سر ءَ جوڑ کنگ ءِ واستہ حکومت ءِ حکمت عملی ءِ کلیدی بھر اَنت۔
