اسلام آباد۔22مئی (اے پی پی): پاکستان ءُ چین ءِ نیام ءَ سفارتی سیادی ءِ 74 سال سرجم بوھگ ءِ درگت ءَ سلک روڈ کلچرل سنٹر ءَ مزنیں مراگشے برجم دارگ بوت۔ مراگش ءَ چین ءِ سفیر جیانگ زیڈونگ ءُ راجی اسمبلی ءِ اسپیکر سردار ایاز صادق ءَ ہوار مہمانیں مردماں بہر زرتگ۔ اے موہ ءِ سر ءَ دوئیں ملک آنی نیام ءَ “آہنی دوستی” ءِ پائیداری ءَ را سک باز ستا کنگ بوتگ۔ اے مراگش ءِ تہ ءَ پیش کنگ بوتگیں دود ءُ ربیدگ ءِ کار آنی تہ ءَ دوئیں ملک آنی نیام ءَ گہتریں سیادی ءُ یکے دومی ءِ احترام ءِ درشانی بوتگ۔ اے مراگش ءِ دلکشیں بہر پاکستانی ازمکار عمر شاہد (اومی) ءِ پیشدارگ ات کہ آئی ءَ چینی گانا ”وو من بو یی یانگ“ ءِ پیشدارگ ءَ مہماناں دلگوش دات۔ ایشانی دل ءَ ٹچ کنوکیں کارکردگی ءَ را جوانیں رنگ ءَ وش اتک کنگ بوت ءُ اسپیکر ایاز صادق ءَ ایشانی توسیپ کت کہ آہاں چینی دود ءُ ربیدگ ءَ را خراج تحسین پیش کتگ۔ وتی ھیالانی درشانی کنان ءَ عمر شاہد ءَ گوشت کہ منی واستہ شرپ ءِ گپ انت کہ من انچیں مزنیں اسٹیج ءِ سر ءَ چینی گانا ءِ وسیلگ ءَ ساہیوال پاور پلانٹ ءِ نمائندگی کت کناں۔ مراگش ءَ چینی دود ءُ ربیدگ ءِ جوانیں جھلک ھم ھوار بوتگ اَنت کہ ایشی ءِ تہ ءَ روایتی رقص، جادوئی شو، کنگ فو ءِ وشیں مظاہرہ ءُ چینی چائے جوڑ کنگ ءِ فن ءِ زندگیں مظاہرہ ھوار اَنت۔ اے کار نہ ایوک ءَ مزہ ءِ بوتگ انت بلکیں چینی دودمان ءِ زیبائی ءَ ہم رژنائی داتگ انت۔ مراگش ءِ گڈسرا چینی روایتی آرٹ، دستکاری ءُ ساز ءُ زیمل ءِ نمائش ءِ برجم دارگ بوتگ کہ ایشی ءَ چہ دوئیں ملک آنی نیام ءَ دود ءُ ربیدگ ءِ سیادی گیش مھکم بوتگ۔ مہماناں چینی چائے ءِ جتا جتائیں وڑ ءُ پیم ءِ دعوت دیگ بوت کہ دوئیں راجانی مہمانداری ءُ گرمائش ءِ علامت انت۔ اے یاتگاریں مراگش نہ ایوک ءَ پاکستان ءُ چین ءِ نیام ءَ راجدپتری سیادی ءِ جشن بوتگ بلکیں اے عزم ءِ پدا پدر کنگ بوتگ کہ دوئیں ملک آیوکیں سال آنی تہ ءَ دود ءُ ربیدگی یکوئی ءُ کمک ءَ را گیش دیمروئی دیگ ءَ برجاہ دار اَنت۔
