اسلام آباد۔ 22مئی (اے پی پی) وزیراعظم محمد شہباز شریف پارینے کہ میکرواکنامک کہول آ اصلاحات تون اوار اوار ادارہ جاتی اصلاحات اٹی ترندی اتنگ حکومت نا اولیت ءِ۔ داخیال آتا درشانی ءِ او جہانی مالیاتی ادارہ نا ڈل اتون گپ وتران کرساکرے ہراجہاد الظہور نا کماشی ٹی پنچ شنبے نادے آ داڑے اوڑتون اوڑدہی کرے۔ اوڑدہی ٹی بنجائی وزیر احدخان چیمہ، محمد اورنگزیب، سیکرٹری خزانہ امداداللہ بوسال، چیئرمین ایف بی آر راشد محمود لنگڑیال و تعلقدار بڑزکو کمامدارآک بشخ ہلکر۔ وزیراعظم آفس نا میڈیا ونگ انا کنڈآن جاری بیان نا رداٹ اوڑدہی ٹی پاکستان اٹی برجاآئی ایم ایف نا پروگرام آ گپ وتران کننگا و حکومت نا آئی ایم ایف پروگرام آ عملدرآمد نا بابت زرگزرانی اصلاحات و مثبت نتیجہ غاتیا ست جمی نا درشانی ءِ کننگا۔ وزیراعظم پارے کہ اللہ نا فضل و کرم اٹ پاکستان زرگزرانی سوگوی آن پد شونداری نا کنڈآ ہِننگ ءِ۔ حکومت نا اولیت ءِ کہ میکرو اکنامک کہول آ اصلاحات تون اوار اوار ادارہ جاتی اصلاحات اٹی ہم ترندی اتنگے۔ ڈل اصلاحات و زرگزرانی سوگوی و شونداری ٹی آئی ایم ایف نا کنڈآن کمکاری ءِ برجاتخنگ نا عزم انا درشانی ءِ کرے۔
