اسلام آباد۔ 22مئی (اے پی پی) ڈپٹی چیئرمین سینیٹ سیدال خان تون سینیٹر دوست محمد خان، انجم عقیل و سیکرٹری ریلوائی سید مظہر علی شاہ، وکلاء، طالب علم قبائلی سرکڑدہ، ایلو ڈل آک اوڑدہی کریر و سیاسی ، زرگزرانی و السی راجی آسودہی ، تعلیم جان جوڑی شونداری ڈٹ آتا بابت امور آ گپ وتران کریر ۔ سینیٹ سیکرٹریٹ آن جاری اعلامیہ نا رداٹ ڈپٹی چیئرمین سینیٹ داوخت آ گپ وتران کرسا پارے کہ ملک انا زرگزرانی حالیت ءِ گچین کننگ کن حکومت پدریسہ پبی گام گیج کننگ ءِ۔ تعلیم، جان جوڑی، انفراسٹرکچر و زرکاری نا مون آ دننگ کون آ بشخ آتیٹی گچینی اتنگ کن جوان ڈٹ بندی کننگانے تانکہ الس نا زند اٹی مثبت و پائیدار بدلی اس ممکن کننگ مرے۔ اوزور شاغا کہ غٹ سیاسی جماعت آتا نمائندہ و ادارہ غاک اواری اٹ السی ویل آتا ایسری کن تینا کڑد ءِ ادا کیر ۔ اوپارے کہ ملک اٹی امن و ایمنی کن گچین حکمت عملی اس تینا کننگانے و سیکورٹی ادارہ غاک تین پہ تینی کمک اٹ پبی وڑاٹ تینا زمواری تے پورو کننگ ءُ۔ پاکستان اندرونی و بیرونی چیلنج آتیان پد ہم سلامتی نا بابت اہم سرسہبی دوئی کننگ ءِ۔ ڈپٹی چیئرمین سینیٹ سیدال خان سیکرٹری ریلوائی سید مظہر تون ملک اٹی ریلوائی نا نظام نا گچینی، پوسکنی و ساڑی آ پوسکن آ ڈٹ آتیا سرجمی اٹ گپ وتران مس۔ ڈپٹی چیئرمین پارے کہ ساڑی حکومت تینا سیوتی تتون اواری اٹ ریلوائی نا چندی جوان ڈٹ مرتب کرینے ہرافتیا عملدرآمد آن نئے بیرہ ریلوائی نظام اٹی پوسکن آ خواست آتا رداٹ گچینی بریک بلکن مسافر آتے گچین سفری آسراتی ہم دُوبریک ۔ اوپارے کہ ریلوائی کون آ اہم قومی ادارہ غاتا بحالی و شونداری ملکی زرگزران کن تمبہ نا حیثیت تخک و اونا نظام اٹی شفافیت ، گچینی و تکنیکی جدت وخت انا اہم گرج ءِ۔ ڈپٹی چیئرمین سینیٹ بلوچستان نا شونداری نا ذکر ءِ کرسا پارے کہ بلوچستان کون آ پسماندہ صوبہ ءِ قومی شونداری نا مرکزی دنگ اٹ اوار کننگ کن خصوصی چکار تننگ انگ ءِ۔ ریلوائی نا ودکی ڈٹ آتیٹی بلوچستان ءِ خاص اولیت تننگانے تانکہ ہموجاگہ نا الس ءِ ہم آب اٹ سفری آسراتی دوبننگ کے و صوبہ ٹی زرگزرانی شونداری نا پوسکن آ دور بناکے۔ اوپارے کہ بلوچستان اٹی ریلوائی لائنز نا گچینی و پوسکن آ روٹ آتا تفنگ آن نئے بیرہ علاقائی رابطہ سوگو مریک بلکن واپاری سرجزآتے ہم مون آ دننگک، ہراملکی شونہالی کن بے کچ اہم ءُ۔ سیدال خان پارے کہ صوبہ بلوچستان پاکستان نا روشنا آخبت نا ضمانت ءِ سی پیک نا ڈٹ آک نئے بیرہ صوبہ بلوچستان بلکن پاکستان و مچ آ ڈیہہ انا تقدیر ءِ بدل کننگ اٹ اہم کڑد اس ادا کننگ کیرہ۔
