اسلام آباد۔ 22 مئی (اے پی پی) نائب وزیراعظم و وزیرخارجہ سینیٹر اسحاق ڈار سانحہ خضدار نا مذمت ءِ کرساپارینے کہ بھارتی پراکسیک بایدے بس کیر، دابابت آخبت نا لائحہ عمل آ بایدے سلابت مرے، اسہ کمیٹی اس جوڑ کننگے ہرا دا بابت ملک انا آخبت نا کسر نا تعین ءِ کے، نن افریقی ملک آتیٹی امن و سوگوی نا مخ تفی ءِ کینہ۔ پنچ شنبے نادے آ سینیٹ نا دیوان اٹی گپ وتران کرسا اوپارے کہ خضدار آنبار واقعہ غاتے ہچ ءُ وڑاسے ٹی منپنہ، اونا مذمت ءِ کینہ۔ اوپارے کہ بھارتی پراکسیک بایدے بس کیر۔ تہوٹی و ڈغار آ اوفتا منہ دے مست ہرا حالیت مسنے اوڑآن اوفک گڑاس ہیل کیر او، اونا دورہ ءِ چین اٹی ڈیہہ اٹی دہشت گردی نا چٹفنگ آ سرجمی اٹ گپ وتران کرے۔ دااوڑدہی ٹی چین و اوغانستان نا وزراء خارجہ غاتون ہم اوڑدہی مس۔ ایوان نا جوزہ غاتا درک ارے۔ دا بابت آخبت نا لائحہ عمل آ بایدے سلابت مرے۔ اسہ کمیٹی اس جوڑ کننگے ہرادابابت ملک انا آخبت نا کسر نا تعین ءِ کے۔ اے پی ایس آ جلہو آن پد قومی یکجہتی پلان اس پیدوار کننگا ہرانا گڑاس دوئی کننگ آ عمل کننگا۔ اوپارے کہ وزیراعظم، سیول و فوجی سرکڑدہ غاک دادہشت گردی نا چٹفنگ آ چکار کرینو۔ اوپارے کہ افریقی سفارتی برادری ءِ ایوان اٹ بخیراٹ پانہ۔ اینو پاک افریقہ یوم سنگتی اڈتننگ ءُ ہراکہ درشانی نا موقع اس فراوان کیک ۔ سینیٹ نا کنڈآن چیئرمین سینیٹ یوسف رضاگیلانی ایوان و سینیٹ نا باسک آتا کنڈآن افریقی ملک آتا حکومت و الس ءِ مبارکبادی ایتیوہ۔ اینو نن نئے بیرہ تاریخی تعلقداری بلکن، کمکاری ، شرف و سٹریٹجک اختہ ئی تیا تالان تعلقداری تے مون آ دننگ نا عزم کینہ۔ پاکستان و افریقہ تاریخی یکجہتی ٹی تفوک ءُ۔ 20می صدی ٹی افریقی ملک آک استعماری واکدار آتا مقابلہ ءِ کریر ، انسانی وقار انصاف و حق اداریت نا اسیجائی قدر تخرہ۔ نن اقوام متحدہ، اوآئی سی و افریقی یونین اٹی افریقی ملک آتا خواست آتا مخ تفی ءِ کینہ۔ نن افریقی ملک آتیٹی امن و سوگوی نا مخ تفی ءِ کینہ۔ پاکستان اقوام متحدہ نا امن مشن نارداٹ افریقہ ٹی امن ٹی اہم کڑد ادا کرینے۔ افریقہ زرگزرانی شونداری نا بشخ اٹ مون آ ہِننگ ءِ۔ دارداٹ پاکستان انگیج افریقہ پالیسی آ عمل نا بناءِ کرے، ہرانا مسخت زرگزران، سیکورٹی، سفارتی و غٹ بشخ آتیٹی تعلقداری تے مون آ دننگ ءِ۔
