اسلام آباد۔ 22مئی (اے پی پی) پی پی پی نا راہشون سینیٹر شیری رحمان پارینے کہ پاکستان نا گل زمین آ ہروڑنا دہشت گردی ءِ ہرحال اٹ بے سہب کننگک و قومی سلامتی آ ہچ ءُ سمجھوتہ اس کننگپک، کودک چناتا شہیدی آ نن غٹ بھاز افسردہ و غمزدہ اُن۔ داجلہو بیرہ خاہوت آتیا آخا بلکن مچ آ قوم انا است آ جلہوءِ ۔ پنچ شنبے نادے آ سینیٹ نادیوان اٹی اوپارے کہ بھارت پاکستان اٹی دہشت گردی کن بی ایل اے کون آ ٹولی تے تربیت و سلہہ تننگ ءِ، دا ریاستی دہشت گردی نا زمرہ ٹی بریک ہراڑآ نن سینیٹ اٹی باقاعدہ قرارداد اس ہم منظور کینہ۔اویات ترفے کہ بے نظیر بھٹو ہم دہشت گردی نا شست مس ہنداسوب آن دا ویل اسہ جماعت یا علاقہ سے نا اف بلکن مچ آ قوم انا ویل ءِ۔ شیری رحمان پیدوار کرے کہ بلوچستان اٹی دہشت گردی کروک آک سیاسی بندغ افس بلکن ریاست دشمن زموار ءُ، سیاسی اختلاف آتے دہشت گردی نا کمک اٹ طے کننگ مفک۔ اوپارے کہ کودک اسکول چناتے اسکول آ ہنسا دہشت گردی نا شست کننگا ہراناقابل معافی ڈوہ اسے۔ اونا پاننگ ئس کہ پاکستان دہشت گردی نا برخلاف کیہی آپریشن کرینے و اینو ہم دا جنگ برجاءِ۔ سینیٹر شیری رحمان پارے کہ نن مدام زمواری و لچک نا درشانی ءِ کرین ولے دشمن نا جارحیت نا پبی ورندی ءِ تسن۔ اویات ترفے کہ کلبھوشن یادیو کون آ بھارتی جاسوس ءِ پاکستان دزگیرکرے ہرا دہشت گردی نا نیٹ ورک نا بشخ ئس۔ اوپارے کہ ننا پارٹی نا کیہی راہشون بلوچستان و خیبرپختونخوا ٹی دہشت گردی نا شست مسر و نن گودی بینظیر بھٹو کون آ سرکڑدہ غاتے ہم دہشت گردی ٹی گوہان۔ سینیٹر شیری رحمان ایوان ءِ معلومدار کرے پاکستان تون بھارت نا نیام تمنگ و دہشت گردی نا شاہدی ساڑی ءِ وخت اس کہ بھارت اینو اسکان اسہ دوبہ سے نا ہم شاہدی تننگ کتنے۔ اوپارے کہ ساڑی آ 87 گھنٹہ نا بے چیٹی ٹی بھارت لس شاری تے شست کرے، وخت اس کہ پاکستان بیرہ فوجی ہدف آتے شست کرسا تینا اخلاقی برتری نا شاہدی ءِ تس۔ اوداعزم انا درشانی ءِ کرے کہ پاکستان نا گل زمین آ ہروڑنا دہشت گردی ءِ ہرحال اٹ بے سہب کننگک و قومی سلامتی آ ہچ ءُ سمجھوتہ اس کننگپک۔
