اسلام آباد۔ 21مئی (اے پی پی) بنجائی وزیرحوالکاری وشینکاری عطاء اللہ تارڑ بلوچستان نا ضلع خضدار اٹی اسکول بس آ دشمن نا لغور جلہو نا ترندی اٹ مذمت ءِ کرسا پارینے کہ دشمن ننا تاریخ آن نابلد ءِ، ہراتم قربانی نا وخت بریک تو پاکستانی چناتا داستان تے ہم روشنا لوز آتیٹی نوشتہ کننگک، قوم یکجاءِ، بھارت نا ڈکوئی اٹ کروک آ کارروائی تا پبی ورندی ءِ تننگک و دہشت گردی ءِ پورو چٹفنگک۔ چارشنبے نادے آ قومی اسمبلی نا دیوان اٹی گپ وتران کرسا بنجائی وزیر حوالکاری پارے کہ قوم بہادری و دلیری اٹ پاکستان نا فوج اتون تفے، دشمن ءِ شکست تننگ آ اللہ تعالیٰ نا شکر ءِ ادا کینہ۔ اوپارے کہ اینو دشمن بلوچستان نا ضلع خضدار اٹی اسکول بس آ لغوری اٹ جلہو کرے ہراٹی کودک چناتے شست کننگا۔ او پارے کہ دشمن ننا تاریخ آن نابلد ءِ ، ہراتم قربانی نا وخت بریک تو پاکستانی چناتا داستان تے ہم روشنا لوز آتیٹی نوشتہ کننگک۔ عطاء اللہ تارڑ پارے کہ دشمن اٹی دا طاقت و جیرت اف کہ او روایتی جنگ اٹی پاکستان ءِ شکست تننگ کے۔ اوپارے کہ فیلڈ مارشل جنرل عاصم منیر نا کماشی ٹی پاکستان نا فوج روایتی جنگ اٹی بھارت ءِ دنز تس، داسہ دشمن پراکسیز نا کمک اٹ ملک آ جلہوگیرءِ، خاص وڑاٹ بلوچستان و خیبرپختونخواٹی فتنۃ الخوارج نا فنڈنگ و سپورٹ نا کمک اٹ دہشت گردی ناواقعہ کرفنگ انگ ءِ۔ اوپارے کہ دشمن روایتی جنگ اٹی ہچ ءُ سرسہبی اس دوئی کتنے، اودے تاریخ نا بدترین شکست مس۔ بنجائی وزیرپارے کہ پاکستان نا قوم یکجاءِ، فتنۃ الخوارج ویل اس اف، نن تو بھارت نا ایئربیس، براہموس و رافیل جہاز آتے خلکن بِٹین۔ اوپارے کہ داایوان چناتیا جلہو نا پبی مذمت ءِ کیک، مچ آ پاکستانی قوم بھارت نا پراکسیز ءِ زوت شکست ایتک۔ اوپارے کہ ٹولی تیٹی چرینگوک آ دہشت گرد آتے چٹفسا آسرات تولنہ ۔ اوپارے کہ دہشت گرد ٹولی دا غلط گمانی ٹی مف کہ چناتے شست کرسا او قوم ءِ نزور کننگ کیک۔ بنجائی وزیر پارے کہ ہراتم اسکان اسہ اسہ دہشت گرد ءِ جہنمی کننگپک ، آسرات تولپنہ۔ اوپارے کہ اینو پیش بروک آ واقعہ نا جاست وپاست برجاءِ و اوار زموار آتے اوفتے اوفتا کروک نا سزاتننگک۔ عطاء اللہ تارڑ پارے کہ گڑاس چناآئی سی یو ٹی درمان مننگ ءُ، او ٹھپی چناتا زوت دراخ جوڑی کن دعاکرے۔ ایسر اٹ او داعزم انا درشانی ءِ کرے کہ بھارت نا ڈکوئی اٹ کروک آ کارروائی تا پبی ورندی ءِ تننگک و دہشت گردی ءِ پورو چٹفنگک۔
