اسلام آباد۔ 21مئی (اے پی پی) وزیراعظم محمد شہباز شریف بلوچستان نا ضلع خضدار اٹی اسکول بس آ بھارتی سرپرستی ٹی کاریم کروک آ دہشت گرد آتا لغورانگا جلہو نا ترند انگا لوز آتیٹی مذمت ءِ کرساپارینے کہ دہشت گرد آک اسکول بس آ جلہو کرسا درندگی نا غٹ حدآتے پار کریر، اوفتے انجام اسکان سرکرسا گڑا آسرات تولنہ۔ چارشنبے نادے آ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم جلہو نا شست مروک آ چناتا لمہ و باوہ غاتون ہمدردی نا درشانی ءِ کرسا کودک چناو استاد آتا شہیدی آ ڈکھیائی و است ہسونی نا درشانی ءِ کرے۔ او واقعہ نا زموار آتا دمدستی ڈس ءِ خلنگ و سخت سزاترفنگ نا پارت کرے۔ وزیراعظم واقعہ ٹی ٹھپی تے دمدستی طبی امداد نا فراوانی ءِ پک کننگ نا ہم پارت کرے۔ وزیراعظم پارے کہ بھارتی سرپرستی ٹی کاریم کروک آ دہشت گرد آتا اسکول بس اٹی کودک چناتیا جلہو اوفتا بلوچستان اٹی تعلیم دشمنی نا شاہدی ءِ، دہشت گرد آک اسکول بس آ جلہو کرسا درندگی نا غٹ حد آتے پار کریر، بھارتی سرپرستی اٹی دادہشت گرد آتے انجام اسکان سرکرسا گڑاآسرات تولنہ۔ وزیراعظم پارے کہ بھارتی حمایت یافتہ دا دہشت گرد آتا بلوچستان نا امن ءِ خراب کننگ ناناپاک عزم ءِ مش تا کرفنگ کن ہرحداسکان کانہ۔ وزیراعظم پاکستان نا آخبت، کودک چناتے شست کروک آ دہشت گرد آتے اوفتے اوفتا کروک نا سزا تننگ نا عزم انا درشانی ءِ کرسا پارے کہ کنتون اوار مچ آ قوم انا ہمدردیک دہشت گرد آتا بربریت نا شست مروک آ کودک چناتا خاہوت آتون ءُ، سیکورٹی فورس و حکومت پاکستان ملک آن دہشت گردی نا پورو چٹفنگ کن سنبرینگوک و یکجاءُ۔
