بیجنگ۔ 21مئی (اے پی پی) نائب وزیراعظم و وزیرخارجہ سینیٹر محمد اسحاق ڈار بیجنگ اٹی سی پی سی نا 20 می مرکزی کمیٹی نا سیاسی بیورو نا باسک و چین نا وزیرخارجہ وانگ یی تون اوڑدہی کرے۔ دفترخارجہ نا کنڈآن جاری بیان نا رداٹ اوڑدہی روایتی گرم جوشی و ہم گرنچی نا چاگڑد اٹی مس ہرا پاک چین سنگتی نا ڈیک ءِ، ہڑتوم آراہشونک سویلی ایشیا نا ساڑی آ حالیت، ہڑتوم آ کنڈآتا تعلقداری نا چندی پلو و کثیر الجہتی فورم تیا کمکاری تون اوار چندی سرحال آتیا سرجمی اٹ گپ وتران کریر۔ نائب وزیراعظم پاکستان نا وتواجہی، علاقائی سالمیت و تینا دفاع نا حق انا رکھ اکن چین نا حکومت و الس نا کنڈآن پدریسہ مخ تفی نا ستاءِ کرے ۔ چین اکن اونا بنداوی ویل آتیا پاکستان نا بدل مفروک مخ تفی نا درشانی ءِ کرسا اوہمہ موسمی سٹریٹجک کوآپریٹیو پارٹنر شپ ءِ پین گہرا کننگ کن پاکستان نا عزم انا درشانی ءِ کرے ہرا سرکڑدہ نا تصور و ہڑتوم آ ایلم ملک آتا الس نا است خواہی آ تالان ءِ۔ نائب وزیراعظم اقوا م متحدہ نا سلامتی کونسل نا قرارداد آتا رداٹ جموں وکشمیر نا جھیڑہ نا ایسری ءِ ڈیہہ اٹی دیرپا امن نا دوئی کننگ کن المی گوندا۔ نائب وزیراعظم و وزیرخارجہ محمد اسحاق ڈار نا بیجنگ اٹی خیرمقدم ءِ کرسا وزیرخارجہ وانگ یی داہیت آ زور شاغا کہ چین پاکستان ءِ اسہ آہنی سنگت و ہمہ موسمی اسٹریٹجک پارٹنر نا وڑاٹ ہرک۔ اوہڑتوم آ کنڈآتا تعلقداری تے کمکاری و شریداری نا پوسکن آ بڑزی تسکان سرکننگ نا چین نا است خواہی نا درشانی ءِ کرے۔ تینا وتواجہی و علاقائی سالمیت نا رکھ اٹی پاکستان نا سنبرینگوک موقف نا ستاءِ کرسا اوداہیت ءِ پک کرے کہ چین علاقائی امن، شونداری و سوگوی ءِ مون آ دننگ کن پاکستان تون اواری اٹ کاریم ءِ برجاتخک۔ وزیرخارجہ وانگ یی داہیت انا ہم درشانی ءِ کرے کہ آہنی ایلم نا حیثیت اٹ چین مدام پاکستان نا وتواجہی، سالمیت و شونداری نا کسر نا مخ تفی ءِ کیک۔ فریق آک پاک چین تعلقداری نا چندی جہت آتا جاچ ءِ ہلکر و ہڑتوم آ کنڈآتا تعلقداری نا مثبت رفتار آ است جمی نا درشانی ءِ کریر۔ اوواپار، زرکاری، آئی سی ٹی، کشت وکشار، صنعت کاری و ایلو اہم بشخ آتیٹی کمکاری ءِ پین گہراکننگ نا عزم کریر۔ ہڑتوم آکنڈآک علاقائی رابطہ و اقتصادی شونداری ءِ ودفنگ کن سی پیک نا اہمیت نا ذکر ءِ کریر و سی پیک فیز IIانا پدریسہ پیش رفت آ است جمی نا درشانی ءِ کریر۔ اوسرسہبی نا کمکاری کن خاص وڑاٹ سی پیک ڈٹ آتیٹی مسٹ میکو فریق نا بشخ ہلنگ نا پوسکن آ کسر نا کمک اٹ مون آ بروک وارخواہی تیا ہم زور شاغار۔ ہڑتوم آ راہشونک ڈیہہ و اوڑآن پیشن امن، سلامتی و پائیدار شونداری نا تینا اسیجائی ہدف آتے مون آ ودفنگ کن کثیر الجہتی فورم آتون اوار غٹ کہول آتیا خڑکی رابطہ و ہم گرنچی ءِ برقرارتخنگ آ امنا کریر۔
