اسلام آباد۔20مئی (اے پی پی): سینیٹ ءِ قائم مقام چیئرمین سیدال خان ءَ گوستگیں وھد ءَ پاکستان ءُ ھندوستان ءِ کش ءُ چیل ءِ وھد ءَ ھندی زوراکی ءِ آماچ بوتگیں بے گناہیں شہری ءُ وطن ءِ دفاع ءَ ٹپی بوتگیں سپاھیگ آنی زوت جان سلامتی ءِ نیکیں واھگ آنی درشان کتگ۔ سینیٹ سیکرٹریٹ ءِ نیمگ ءَ چہ جاڑی بوتگیں بیان ءِ رد ءَ سینیٹ ءِ قائم مقام چیئرمین سیدال خان ءَ سی ایم ایچ راولپنڈی ءَ علاج ءِ وھد ءَ ٹپیگ آناں گلدستہ ءُ میوہ ءِ ٹوکری روان داتگ ءُ آھانی زوت جان سلامتی ءِ واستہ ھم دعا کتگ۔ سینیٹ ءِ قائم مقام چیئرمین سیدال خان ءَ گوشت کہ بھارتی زوراکی ءِ سر ءَ موزوںیں پسو دیگ بوتگ ءُ آیوکیں وھد ءَ بھارت اے وڑیں بے ھیالی ءَ چہ دست کش بیت۔ آئی ءَ گوشت کہ گوستگیں کش ءُ گور ءِ وھد ءَ پاکستان ءِ سلاہ بندیں اُرد، توامیں سیاسی گل ءُ ریاستی ادارگ آنی نیمگ ءَ یکوئی ءُ ھمگرنچی ءِ درشان ستا کرزیں ءُ بے درور اِنت۔ سعیدل خان ءَ گیش گوشت کہ پاکستان وتی سرزمین ءِ رکھینگ ءِ واستہ ھرچ وڑیں گامگیج چست کنت ءُ راج ءِ اے یکوئی ھمک دژمن ءَ را موثر پسو دیگ ءِ سرجمیں توان ءَ دار ایت۔ سی ایم ایچ راولپنڈی ءَ علاج ءِ وھد ءَ ھواریں مردمانی تہ ءَ ماتیں وطن ءِ بہادریں زھگ ھوار اَنت ءُ لس مردم بیران بوتگ اَنت۔ قائم مقام چیئرمین سینیٹ ءَ گوشت کہ سرجمیں راج وتی بہادریں سلاہ بندیں اُرد آنی گوما اوشتاتگ ءُ یکجاھ اِنت ءُ دژمن ءِ ھرچ وڑیں جھد ءِ لائکیں پسو دیگ ءِ واستہ تیار اِنت۔ دژمن اے گپ ءِ نوٹ بہ کنت کہ پاکستان امن ءُ ایمنی ءِ ملک انت بلے آئی ءِ حاکمی ءُ ایمنی ءُ شرپ ءِ سرا ہچ وڑیں سمجھوتہ بوت نہ کنت۔ انوگیں واقعہ ءَ یک رندے پدا اے گپ ثابت کتگ کہ مئے قوت ءُ قوم یکجاہ انت ءُ ہر مشکلیں ساھت ءَ یک توار ءِ واھند انت۔ آئی ءَ گوشت کہ میاں اوستمانی براتی ءَ را بھارت ءِ برجاھیں جنگی جنون ءُ ایشی ءَ چہ دمگ ءِ امن ءُ ایمنی ءِ واستہ ھما ھترہ آنی سر ءَ ترندیں نوٹس زورگ لوٹ ایت۔ قائم مقام چیئرمین سینیٹ ءَ گشتگ کہ پاکستان خطہ ءَ ایمنی ءِ واھشت مند انت بلے بھارتی ضد ءُ اشتعال انگیزی ہچ رنگ ءَ منگ نہ بنت۔ آئی ءَ گوشت کہ پاکستان وتی راجی سلامتی ءُ وتی الس ءِ جان ءُ مال ءِ رکھینگ ءِ واستہ ھمک محاذ، سفارتی، سیاسی ءُ جنگی رنگ ءَ ھمک رنگ ءِ گامگیج ءَ برجاہ دار ایت۔ قائم مقام چیئرمین سینیٹ ءَ سی ایم ایچ ءَ علاج ءِ وھد ءَ ھواریں مردمانی ترندیں جان سلامتی ءِ دعا کتگ ءُ آھانی جرات ءُ دلبڈی ءَ را شگر ءُ منت گپتگ۔ سیدال خان ءَ گوشت کہ اے زھگ آنی قربانی ءَ را راج ارزشت دنت ءُ ماتیں وطن ءِ رکھینگ ءِ واستہ آھانی جذبہ ھمک پاکستانی ءِ واستہ فخر ءِ وسیلگ اِنت۔ آئی ءَ ٹپیگ آنی کھول ءِ گوما ھم یکوئی ءِ درشانی کتگ ءُ سرجمیں رنگ ءَ کمک ءِ دل یکیمی داتگ۔
