اسلام آباد۔20مئی (اے پی پی): نائب مزن وزیر ءُ درئی کارانی وزیر سینیٹر محمد اسحاق ڈار ءَ چین ءِ کمیونسٹ پارٹی ءِ میاں اوستمانی محکمہ ءِ وزیر لیو جیانچاؤ ءَ گوں گند ءُ نند کتگ۔ دری کارانی کارگس ءِ رد ءَ گند ءُ نند ءَ دوئیں نیمگ ءَ پاکستان ءُ ھندوستان ءِ نیام ءَ جنگ بندی ءَ پد دمگی جاور ھالانی سر ءَ گپ ءُ تران کنگ بوتگ ءُ دمگی امن ءُ ایمنی ءِ برجائی ءِ واستہ اقوام متحدہ ءِ منشور ءُ میاں اوستمانی کانود ءِ رھبند ءُ مول ءُ مراد آنی سر ءَ زور پر داتگ۔ پاکستان ءِ وت واجہی ءُ سرزمین ءِ یکوئی ءِ واستہ چین ءِ کمک ءِ ساڑات کنان ءَ نائب مزن وزیر ءَ پاکستان ءِ پرامن ہمساہگی ءِ عزم ءِ دوبر پدر کت ءُ وتی سرزمین ءُ الس ءِ دفاع ءِ حق ءُ توانائی ءِ پدر کت۔ نائب مزن وزیر ءَ میاں اوستمانی براتی ءَ را زور پر دات کہ آ بھارت ءِ نیمگ ءَ سندھ ءِ آپانی معاہدہ ءِ ھلاس کنگ ءِ یک نیمگی ءُ غیر کانودی پیسلہ ءِ سر ءَ نوٹس بہ زور اَنت۔ جنوبی ایشیا ءَ دائمی امن ءِ واستہ اقوام متحدہ ءِ سلامتی کونسل ءِ قرارداد آنی رد ءَ جموں ءُ کشمیر ءِ جیڈھ ءِ گیواری المی انت ۔ نائب مزن وزیر ءُ وزیر ءِ درئی کار ءَ چین ءِ کمیونسٹ پارٹی ءُ پاکستان ءِ سیاسی گل آنی نیام ءَ تبادلہ ءِ آسراتی ءِ واستہ آئی ڈی سی پی سی ءِ ھاسیں کرد ءَ را ساڑات۔ پاکستان ءُ چین ءِ سفارتی سیادی ءِ برجائی ءِ 74 سال سرجم بوھگ ءِ موہ ءَ دوئیں نیمگ ءَ پاکستان ءُ چین ءِ دوستی ءِ بے دروریں دروشم ءَ را پدر کت ءُ دوئیں ملک آنی ورنائیں نسل ءَ را سر کنگ ءِ واستہ کوشست آنی برجاہ دارگ ءِ سر ءَ تپاک کت۔
