پروفیسر اسٹیفن ڈرکون ءَ مزن وزیر ءِ ھاسیں کمکار ہارون اختر خان ءَ گوں گند ءُ نند کتگ، معیشت ءِ دیم ءَ اوشتاتگیں چیلنج، صنعتی دیمروئی ءِ موہ ءُ آسراتی آنی سر ءَ گپ ءُ تران

اسلام آباد۔20مئی  (اے پی پی): برطانیہ ءِ نامداریں معیشت زانت پروفیسر اسٹیفن ڈرکون ءَ مزن وزیر ءِ صنعت ءُ پیداوار ءِ ھاسیں کمکار ہارون اختر خان ءَ گوں گند ءُ نند کت۔ اسلام آباد ءَ برجم داشتگیں گند ءُ نند ءَ پاکستان ءِ معیشت ءِ دیم ءَ صنعتی دیمروئی ءِ چیلنج ءُ موہ ءُ آسراتی آنی سر ءَ گپ ءُ تران کنگ بوت۔ گند ءُ نند ءِ تہ ءَ میکرو اکنامکس، زرّ ءِ ذخائر، برآمدات ءُ درآمدات، صنعتی پالیشی ءِ وڑیں کلیدی جیڈھ آنی سر ءَ گپ ءُ تران کنگ بوت۔ ہارون اختر خان ءَ گوشت کہ گوستگیں وھد ءَ ٹیکس ءِ شرح ءُ گرانیں بجلی ءَ چہ صنعتی شوبگ ءَ را سک باز تاوان بوتگ، البت مزن وزیر ءِ ھاسیں ہدایت انت کہ نزوریں صنعت آناں زندگ کنگ ءِ واستہ سرجمیں گامگیج چست کنگ بہ بنت۔ تران کنان ءَ پروفیسر اسٹیفن ڈرکون ءَ گوشت کہ پاکستان ءَ انچیں صنعتی پالیشی جوڑ کنگ لوٹ ایت کہ ایشی ءِ تہ ءَ یک نیمگ ءَ صنعت آناں رکھینگ بہ بیت ءُ دومی نیمگ ءَ پیداواری کار آناں دیمروئی دیگ ءِ واستہ ترغیب دیگ بہ بیت۔ آئی ءَ گوشت کہ دمگی مقابلہ ءِ چاگرد ءَ پاکستانی صنعت آناں برجائی ءِ واستہ یک برجائی ءُ دراجیں مدت ءِ پالیشی ءِ ضلورت انت۔ آئی ءَ صنعت ءُ برآمدات ءِ سر ءَ کسٹم ٹیرف ءِ ممکنہ اثر ءِ سر ءَ ھم زور پر دات ءُ سوج دات کہ جوانیں کارکردگی ءِ صنعتی شوبگ آناں ھاسیں ترغیب دیگ بہ بیت تانکہ آ گیش دیمروئی بہ کن اَنت۔ ہارون اختر خان ءَ گوشت کہ ملک ءِ دیمروئی ءُ روزگار ءِ موہ آنی پیداک کنگ ءِ واستہ صنعتی شوبگ ءَ سرمایہ کاری المی اِنت، ایشی ءِ واستہ حکومت ھمک رنگ ءَ گامگیج کنگ ءَ اِنت۔