اسلام آباد۔20مئی (اے پی پی): پاکستان ءِ مزنیں تمباکو برآمد کنوکیں کمپنی آنی ڈل ءَ سئے شمبے ءِ روچ ءَ بنجاھی وزیر تجارت جام کمال خان ءَ گوں گند ءُ نند کتگ ءُ تمباکو ءِ برآمدات ءِ تہ ءَ گیشی ءُ ٹیکس ءُ ریگولیٹری فریم ورک ءِ ھوالگ ءَ چیلنج آنی سر ءَ گپ ءُ تران کتگ۔ گند ءُ نند ءِ ساھت ءَ برآمد کنوکاں حکومت ءِ تجارتی دیمروئی ءِ کوشست آناں ساڑات ءُ روزگار، میتگ ءِ دیمروئی ءُ برآمداتی آمدنی ءِ تہ ءَ تمباکو ءِ صنعت ءِ ھاسیں کرد ءِ سر ءَ زور پر دات۔ برآمد کنوکاں استیں ٹیکس ءِ ڈھانچہ ءِ سر ءَ ھم تران کت کہ ایشی ءِ تہ ءَ بنجاھی ایکسائز ڈیوٹی ءِ 390 کلدار، صوبائی ایکسائز ڈیوٹی 50، بنجاھی تمباکو ءِ 15.15، ءُ صوبائی دیمروئی ءِ 25 کلدار ھوار اِنت، ایشی ءِ تہ ءَ کلیں ھرچ ءُ درچ 480.15 کلدار اِنت۔ ڈل ءَ گوشت کہ اے ھرچ ءُ درچ ھاسیں رنگ ءَ کسانیں برآمد کنوک آنی واستہ جیڈھ ودی کنت ءُ یک مسابقتی ٹیکس ماڈل پاکستان ءَ را گلوبل مارکیٹ ءَ جوانیں جاہ دات کنت۔ برآمد کنوکاں گوشت کہ تمباکو ءَ را مارکیٹ ءِ سر ءَ بنیات ءِ سر ءَ پالیشی آنی چیر دستی ءَ ھم کمک کنگ بہ بیت چوشکہ زرعی سامان چوشکہ گنی، کپاس، ءُ کوئنوا۔ آئی ءَ اے گپ ءِ نیمگ ءَ ھم دلگوش گور کت کہ انوگیں رھبندانی رد ءَ سالانہ نرخ آنی تہ ءَ ترمیم کنگ المی اِنت کہ ایشی ءَ چہ برآمداتی مقابلہ ءِ تہ ءَ تاوان رسیت۔ بنجاھی وزیر جام کمال خان ءَ برآمد کنوک آنی جیڈھ آناں منگ ءِ وھد ءَ گوشت کہ حکومت متوازن ءُ دیمروئی پالیسی آنی سر ءَ جزم اِنت۔ آئی ءَ گوشت کہ جوانیں آمدنی ءِ پیداوار نا ایوک ءَ ٹیکس ایر کنگ ءَ چہ ممکن اِنت بلکینگ ءَ صنعت ءَ را دیمروئی دیگ ءُ برآمدات ءِ تہ ءَ گیشی کنگ ءَ چہ ھم ممکن اِنت۔ آئی ءَ گوشت کہ اے وڑیں جیڈھ دگہ شوبگ آنی نیمگ ءَ ھم چست کنگ بوتگ، چوش کہ مشروبات ءِ صنعت، گیشیں ٹیکس آنی سبب ءَ صارفین ءِ لوٹ ءُ گزر ءُ آمدنی ءِ سر ءَ منفی اثر کپگ ءَ اِنت۔ گند ءُ نند ءَ برآمد کنوک آنی نیمگ ءَ پاکستان تمباکو بورڈ ءِ زندگ کنگ ءِ لوٹ کنگ بوتگ تانکہ برآمدات ءِ دیمروئی ءُ پالیشی کمک پجاری ءِ تہ ءَ یکجاھیں کوشست کنگ بہ بیت۔ ایشی ءَ پد وزیر ءَ تمباکو ءِ واستہ یک شعبہ جاتی کونسل ءِ جوڑ کنگ ءِ تجویز پیش کت کہ اے کونسل ءِ وڑ ءَ دگہ شعبہ آنی واستہ جوڑ کنگ بوتگ تانکہ صنعت ءِ واستہ باقاعدہ مشاورتی پلیٹ فارم ءِ پجارینگ بہ بیت۔ بنجاھی وزیر ءَ ڈل ءَ را سرپد کت کہ اولی رند ءَ ریونیو پالیسی کمیٹی ءَ را ریونیو ءِ جم کنگ ءِ نظام ءَ چہ جتا کنگ بوتگ کہ اے یک ھاسیں گامگیج اِنت تانکہ پالیسی جوڑ کنگ ءَ را گیش سرپدی ءُ مشورہ ءِ رد ءَ کنگ بہ بیت۔ برآمد کنوکاں گوشت کہ اگاں سرکاری کمک برجاہ بہ بیت گڈا صنعت وتی برآمداتی گنجائش ءَ را مزنیں کساسے ءَ گیش کت کنت۔ رواں مالی سال (جولائی اپریل) ءِ تہ ءَ پاکستان ءِ تمباکو ءِ برآمدات 158.35 ملین امریکی ڈالر ءَ سر بوتگ ءُ ایشی ءِ تہ ءَ بیلجیم، متحدہ عرب امارات، یونان ءُ فلپائن ءِ وڑیں ملک آنی تہ ءَ مزنیں گیشی گندگ بوتگ۔ جام کمال خان ءَ ڈل ءَ را دل یکیمی دات کہ حکومت ءُ جندی شوبگ ءِ کمک ءَ گوں ملک ءَ تمباک ءِ برآمد کنگ ءِ گنجائش ءَ را گیش کنگ بیت ءُ برآمد کنوک آناں ھمک رنگ ءِ آسراتی پجاری کنگ بیت۔
