اسلام آباد۔ 20مئی (اے پی پی) بنجائی وزیر امور کشمیر، گلگت بلتستان و سیفران انجینئر امیر مقام تون مسلم لیگ (ن) آزاد جموں وکشمیر نا اسہ بڑزکو کہول ڈل اس صدر شاہ غلام قادر و جنرل سیکرٹری طارق فاروق نا کماشی ٹی اونا دفتراٹی اوڑدہی کریر۔ داڑے جاری بیان اسے نا رداٹ ڈل اٹی مسلم لیگ (ن) نا سینئر راہشون نجیب نقی، چوہدری رخسار، چوہدری سعید، سردار عمیر نعیم، رابطہ بورڈ انا چیئرمین سردار طارق و اعتزاز ئسک اوار ئسر۔اوڑدہی ٹی ڈل بنجائی وزیر امیر مقام نا ساڑی آ اِرادے ئی دورہ آزاد جموں وکشمیر نا زبردست انداز اٹ ستاءِ کرے و اودے یکجہتی و مخ تفی نا گچین درشانی گوندا۔ داوخت آ بنجائی وزیر انجینئر امیر مقام دا پذیرائی آ منت واری ءِ ہرفے و کشمیر نا ویل اتون تینا بدل مفروک وابستگی نا درشانی ءِ کرے۔ اوپارے کہ دااونا آزاد کشمیر نا ارٹ میکو دورہ ئس ہرا کشمیری الس تون یکجہتی نا درشانی و بھارتی جارحیت اٹی شہید و ٹھپی مروک آتے خراج عقیدت پیش کننگ کن کننگاسس۔ بنجائی وزیر پارے کہ نن تینا کشمیری ایلم وایڑھ تتون ہم کوپہ سلوک اُن و ہرفورم آ اوفتا مخ تفی ءِ برجاتخنہ۔ اوپارے کہ دادورہ بے کچ مثبت اثرشاغا و جہانی برادری ءِ دا پیدوار کلہو تسن کہ پاکستان کشمیری الس تون تینا وابستگی آ سلوک اُن۔ ڈل پارے کہ بنجائی وزیر امیرمقام نا ساڑی آ اِرادے ئی دورہ آزاد جموں وکشمیر ننا تین پہ تینی تعلقداری تے پین سوگو کننگ نا سوب جوڑ مس و دنیا ءِ سیوت نا سوگو کلہو ءِ سرکرے۔ اوڑدہی نا ایسری داعزم اتون مس کہ آزاد جموں وکشمیر نا شونداری و شونہالی کن اسیجائی کوشست آتے برجاتخنگک و کشمیر نا ویل ءِ قومی و جہانی کہول آ پوسکن آجوزہ تون تالان کننگک۔
