اسلام آباد۔ 20مئی (اے پی پی) بنجائی وزیر موسمیاتی بدلی و چاگڑدی رابطہ ڈاکٹر مصدق ملک تون نیشنل ڈیزاسٹر مینجمنٹ اتھارٹی (این ڈی ایم اے) نا چیئرمین لیفٹیننٹ جنرل انعام حیدر ملک بڑزکو کہولی اوڑدہی کرے، ہراٹی ملک اٹی ودوک آ درجہ حرارت و گمانی نوکاپ نا خطرہ غاتا رداٹ بروک آ بشامی سیزن نا تیاری تا جاچ ءِ ہلنگا۔ سے شنبے نادے آ داڑے وزارت موسمیاتی بدلی آن جاری بیان نا رداٹ چیئرمین این ڈی ایم اے بنجائی وزیر ءِ ساڑی آ درجہ حرارت نا حالیت و نوکاپ نا گمانی پیشن گوئی تیان معلومدار کرے۔ اوپارے کہ برجاسال معمول آن زیات درجہ حرارت گمانی ءِ و قطبی علاقہ جات اٹی درجہ حرارت اٹی ودکی نا سوب آن گلیشیئرز نا دِیر مننگ نا رفتار ترند مننگ نا اندیشہ ءِ ہرا دریائے سندھ اٹی نوکاپ نا سوب مننگ کیک۔ اوڑدہی ٹی این ڈی ایم اے نا کنڈآن کاریم اٹ اتوک آ مسہ کہولی پیشگی انتباہی نظام آ ہم سرجمی اٹ گپ وتران مس ہراٹی موسمیاتی پیشنگوئی، سلابتی انتباہ و گڈیکو پک آؤٹ لک اوار ءِ۔ دا نظام خطرہ غاتا وخت آ درستی راستی و گچین رکھی گام گیج نا ڈٹ بندی ءِ ممکن کیک۔ داکان بیدس موسمیاتی و چاگڑدی عوامل آہم تکنیکی حوال تننگا ہرانا بشامی سیزن آ براہ راست اثرتمک ہرافتے ٹی ڈغار و سمندر نا درجہ حرارت اٹی پرخ، سمندر نا کہول آ درجہ حرارت و قطبی نصف کرہ ٹی برف انا تالانی اوار ءِ۔ اوڑدہی ٹی ڈیٹاغا تالان پیشنگوئی و ادارہ جاتی ہم گرنچی نا اہمیت آ زور شاغنگا۔ اوڑدہی نا اسہ جتا سیشن اسے ٹی ہندی کہول آ آفت آتیان بچنگ نا حکمت عملی آ گپ وتران کننگا۔ داوخت آ بنجائی وزیر پارے کہ موسمیاتی مطابقت اصل اٹ آفت آتیان بچنگ ءِ۔ اواسیجائی مالی کمکاری و مربوط ڈٹ آتا گرج آ زورشاغا۔ فریق آک پدسلوک و بے پورو ڈٹ آتیا ہم گپ وتران کریر و ویل آتا پیدواری و پوروی کن اسہ گچین فریم ورک اس تیار کننگ آ امنا کریر۔ دا فیصلہ ہم کننگاکہ آخبت مربوط دیوان اس اڈتننگک ہراٹی نیشنل ڈیزاسٹر مینجمنٹ اتھارٹی ، ضلعی ڈیزاسٹر مینجمنٹ اتھارٹیز، پاکستان محکمہ موسمیات و تعلقدار ڈٹ آتون وابستہ ادارہ غاک شریک مریرہ تانکہ ساڑی ڈٹ آتا وخت آ پوروی و آخبت نا اسیجائی ڈٹ آتیکن حکمت عملی اس تیار کننگ مرے۔ بیان نا رداٹ وزارتِ موسمیاتی بدلی و چاگڑدی ہم گرنچی چاگڑدی چیلنج آتا رداٹ شفاف، فعال و تین پہ تینی شریداری آ تالان ڈٹ بنندی نا عزم آ سلوک ءُ۔
