اسلام آباد۔ 20مئی (اے پی پی) وزیراعظم محمد شہباز شریف خراج دُزی و اسمگلنگ نا توننگ کن پین گام گیج آتا زوت و گچین نفاذ نا پارت کرساپارینے کہ 70 سال انا بگاڑ ءِ سہی کننگ کن سخت گام گیج المی ءِ، خراج تروک آ بندغ و کاروبار ءِ زیات آن زیات آسراتی ایتنہ، خراج دُزی کروک آ بندغ و کاروبار ہچ ءُ وڑ اسے نا رعایت نا حقدار افس۔ سے شنبے نادے آ وزیراعظم آفس نا میڈیا ونگ انا کنڈآن جاری بیان نا رداٹ وزیراعظم محمد شہباز شریف نا کماشی ٹی ایف بی آر نا امور و برجااصلاحات آ جاچ دیوان اس اڈہلک۔ دیوان اٹی بنجائی وزیر اعظم نذیرتارڑ، احدخان چیمہ، محمد اورنگزیب، عطاء اللہ تارڑ، چیئرمین ایف بی آر و تعلقدار بڑزکو کمامدارآک بشخ ہلکر۔ وزیراعظم دیوان آن تران کرساپارے کہ ایف بی آر نا ڈیجیٹائزیشن و نظام ءِ خودکار کننگ کن گام گیج ترندی اٹ برجاءِ۔ اوپارے کہ 70 سال انا بگاڑ ءِ سہی کننگ کن سخت گام گیج المی ءِ، خراج تروک آ بندغ وکاروبار ءِ زیات آن زیات آسراتی ایتنہ، خراج دُزی کروک آ بندغ و کاروبار ہچ ءُ رعایت اسے نا حقدار افس، خراج دُزی کروک آ بندغ و کاروبار نا برخلاف گچین کانودی کارروائی کننگک۔ وزیراعظم ایف بی آر و اونا کمکار کانود نافذ کروک آ ادارہ غاتا خراج کٹیا ٹی ودکی نا کوشست آتا ستاءِ کرے۔ دیوان ءِ پاننگاکہ ملک اٹی سیلز خراج نا دُزی نا توننگ کن نیشنل ٹارگٹنگ سسٹم اس درستی راستی کرفنگ انگ ءِ ، دانظام نا رداٹ مصنوعات آتا ات و در اٹی اوار گاڈیتے ای ٹیگ و ڈیجیٹل ڈیوائس نا کمک اٹ براہ راست ٹریک کننگک۔ داکان بیدس ای۔ بلٹی نا نظام ءِ ہم درستی راستی کرفنگ انگ ءِ ہراکہ ایف بی آر نا سسٹم آ جاری کننگک، ملک انا غٹ بھلا شاہراہ و شارتیٹی داخلہ نا جاگہ غاتیا ڈیجیٹل مانیٹرنگ سسٹم خلنگک، داگام آن اسمگلنگ و سیلز خراج دُزی نا خاتمہ مریک و لس شاری تے سلنگ نا دقت آن نجات و وخت انا بچت مریک، ہندانظام آن زرگزران نا ڈیجیٹائزیشن ممکن مریک و محصولات آتیٹی خاطرخواہ ودکی مریک۔ دیوان ءِ مستی پاننگاکہ بندرگاہ و بالی پٹ آتیا درآمدات و برآمد ات آتا ڈیجیٹل خودکار چاروکی کن کسٹم ٹارگٹنگ سسٹم اس درستی راستی کرفنگ انگ ءِ، دانظام ءِ ہندی و جہانی ڈیٹابیس تون گنڈنگک و مصنوعی ذہانت ءِ کاریم اٹ اتسا خراج دُزی و اسمگلنگ ءِ توننگک۔ دیوان ءِ پاننگاکہ ایف بی آر و تعلقدار ادارہ غاتا افرادی قوت ءِ پوسکن آ نظام آن روشناس کرفنگ کن اوفتا تربیت نا گچین بست وبند ہم کننگ انگ ءِ۔ دیوان ءِ مستی پاننگاکہ دا نظام ءِ اِرا ریسہ غاتیٹی نافذ کننگک، اولیکو ریسہ ٹی اسہ بھلو شار اسے آن اونا پائلٹ پروجیکٹ نا بناءِ کننگک و اوکان پد اودے مچ آملک اٹی نافذ کننگک۔ دیوان ءِ سرمٹ، ہیچریز، پولٹری فیڈ، تمباکو و شربت آتا بشخ اٹی سیلز خراج نا چاروکی نا بابت ہم حوال تننگا۔ دیوان ءِ پاننگاکہ بورہ نا صنعت آ نافذ کروک چاروکی نا نظام آنبار تمباکو، شربت، اسٹیل و سرمٹ نا بشخ آتیٹی پیدوار نا چاروکی کن ایف بی آر و کمکار ادارہ غاتا آفیسر و کارندہ تعینات کننگانے۔ وزیراعظم غٹ گام گیج آتے زوت، گچین وپائیدار وڑاٹ نافذ کننگ نا پارت کرے۔
