اسلام آباد۔ 20مئی (اے پی پی) بنجائی وزیر ڈٹ بندی احسن اقبال تون وزیراعلیٰ بلوچستان میر سرفراز بگٹی اسلام آباد اٹی اوڑدہی کرے۔ اوڑدہی ٹی صوبہ ٹی پی ایس ڈی پی نا رداٹ برجاشونداری ڈٹ آتیا سرجمی اٹ گپ وتران کننگا۔ داوخت آ بلوچستان نا شونداری، وسیلہ غاتا انصاف اٹ بشخنگ و گچین ڈٹ بندی نا بابت اہم سلابت کننگا۔ اوڑدہی ٹی گپ وتران کرسا بنجائی وزیر ڈٹ بندی احسن اقبال پارے کہ حکومت بلوچستان نا شونداری کن ہرممکن کمک فراوان کننگ ءِ، صوبہ ٹی برجا ڈٹ آک السی آسودہی و دیرپاشونداری نا کنڈآ مثبت ءُ گام اسے ۔ بنجائی و صوبائی حکومت آتیٹی ہم گرنچی نا کمک اٹ بلوچستان ءِ شونداری نا پوسکن آ کسر تیا دینہ ۔ احسن اقبال پارے کہ کوشست ءِ کہ بروک آ پی ایس ڈی پی نا کچ ءِ ودفسا صوبہ غاتے پین شونداری وارخواہی فراوان کننگے۔ اوڑدہی ٹی وزیراعلیٰ بلوچستان میر سرفرازبگٹی پی ایس ڈی پی 2025-26نا جاچ ءِ ہلک و غٹ ڈٹ آتیا است جمی نا درشانی ءِ کرے۔ وزیراعلیٰ پارے کہ صوبائی حکومت شونداری عمل اٹی بنجاتون گام اتون گام ملفسا چلینگ انگ کن سنبرینگوک ءِ، شونداری ایجنڈاٹی بنجاتون صوبہ غاتا شریداری ستاکڑزک۔
