اسلام آباد۔ 20مئی (اے پی پی) وزیراعظم نا خصوصی کمکار صنعت و پیدوار ہارون اخترخان تون پنی آ برطانوی ماہر اقتصادیات پروفیسر سٹیفن ڈرکون اوڑدہی کرے۔ اسلام آباد اٹی مروک آ دا اوڑدہی ٹی پاکستان نا زرگزران ءِ مون تروک چیلنج، وارخواہی و صنعتی شونداری نا گمان تیا گپ وتران کننگا۔ اوڑدہی ٹی میکرواکنامکس ، زرمبادلہ نا کوڑی، برآمدات و درآمدات و صنعتی پالیسی کون آ اہم امور آتیا شرہ مس۔ ہارون اخترخان پارے کہ مستین اٹی خراج نا کچ و کبین بجلی صنعتی بشخ ءِ بھاز نسخان رسینگا، ولے وزیراعظم نا خصوصی پارت ءِ کہ نزور صنعت آتا بحالی کن جوان گام گیج کننگے۔ پروفیسر اسٹیفن ڈرکون گپ وتران کرسا پارے کہ پاکستان ءِ ہندن ءُ صنعتی پالیسی اس ٹہیفنگے ہرا اسہ کنڈآ صنعت آتے رکھ فراوان کے و ایلو کنڈآ پیدواری سرجزآتے مون آ دننگ کن ترغیب ہم ایتے۔ اوپارے کہ علاقائی مقابلہ نا فضاٹی پاکستانی صنعت آتے برقرارتخنگ کن اسہ آخبتی و دیرپاپالیسی المی ءِ۔ اوکسٹمز ٹیرفس نا صنعت و برآمد آتیا گمانی اثرآتے ہم مون آتخا و سلاہ تس کہ گچین کارکڑد نشان تروک آ صنعتی بشخ آتے خصوصی بایدے آسودہی تننگے تانکہ او پین شون ہلنگ کیر۔ ہارون اختر خان پارے کہ ملکی شونداری و روزگار نا وارخواہی ودی کننگ کن صنعتی بشخ اٹی زرکاری المی ءِ، و حکومت دامسخت کن ہرممکن گام گیج کننگ ءِ۔
