اسلام آباد۔ 20مئی (اے پی پی) پاکستان نا پنی آ تمباکو برآمد کنندگان آتا اسہ ڈل اس سے شنبے نادے آ بنجائی وزیر واپار جام کمال خان تون اوڑدہی کرے، ہراٹی تمباکو نا برآمد آتیٹی ودکی و محصولات و ضابطہ جاتی فریم ورک تون تعلقدار چیلنج آتیا گپ وتران کننگا۔ اوڑدہی ٹی برآمد کنندگان آک حکومت نا واپاری مون آ دننگ نا کوشست آتا ستاءِ کریر و تمباکو نا صنعت نا روزگار، خلقی شونداری و برآمدی کٹیا ٹی اہم کڑد ءِ تالان کریر۔ برآمد کنندگان آک ساڑی آ خراج پنجرآہم گپ وتران کریر، ہراٹی فی کلوگرام 390 روپئی فیڈرل ایکسائز ڈیوٹی، 50 روپئی صوبائی ایکسائز ڈیوٹی، 15.15روپئی فیڈرل ٹو بیکوسیس، و25 روپئی صوبائی ڈویلپمنٹ سیس اوار ءُ یعنی جم خڑچ فی کلوگرام 480.15روپئی جوڑ مریک۔ ڈل پارے کہ دا خڑچ خاص وڑاٹ چنکا برآمد کنندگان آتیکن مشکل ودی کیک و اسہ مسابقتی خراج ماڈل پاکستان ءِ جہانی منڈی ٹی گچین ءُ ہند اس ترفنگ کیک۔ برآمد کنندگان آک پاریر کہ تمباکو ءِ ہم گنڈیری، کرپاس و کینو کون آ کشاری اجناس آتیانبار مارکیٹ آ تالان پالیسی تا رداٹ سپورٹ کننگے۔ اوفک داہیت آ ہم چکار کرفیر کہ ساڑی آ ضابطہ نا رداٹ سالانہ نہاد آتیٹی ردوبدل المی ءِ، ہرا برآمدی مسابقت ءِ زہمی کیک۔ بنجائی وزیر جام کمال خان برآمد کنندگان آتا گڑتی تےامنا کرسا پارے کہ حکومت بریبر و شونداری پالیسی تیکن سنبرینگوک ءِ۔ اوپارے کہ محصولات آتا گچین دوئی کننگ بیرہ خراج خلنگ تون اف بلکن صنعت نا مون آ دننگ و برآمد آتا ودکی آن ہم ممکن ءِ۔ اوپارے کہ ہنداوڑنا گڑتی ایلو بشخ کون آ شربت آتا صنعت آتا کنڈآن ہم مون آ بسنے کہ زیات خراج صارف آتا خواست و محصولات آ تیا منفی اثرشاغنگ ءِ۔ اوڑدہی ٹی برآمد کنندگان آک پاکستان ٹوبیکو بورڈ انا بحالی نا خواست ءِ کریر تانکہ برآمد آتا مون آ دننگ و پالیسی کمکاری ٹی مربوط کوشست کننگ مرے۔ داڑآ وزیر تمباکو کن اسہ سیکٹورل کونسل اسے نا جوڑ کننگ نا سلاہ تس، دُن کہ ایلو بشخ آتیکن جوڑ ءِ، تانکہ صنعت کن اسہ باقاعدہ سلابتی پلیٹ فارم اس مہیا کننگ مرے۔ بنجائی وزیر ڈل ءِ معلومدار کرے کہ اولیکو وار ریونیو پالیسی کمیٹی ءِ محصولات آتا وصولی نا نظام آن جتا کننگانے، ہراکہ اسہ اہم ءُ گام اسے تانکہ پالیسی سازی پین معلوماتی و سلابتی بنداوتیا مرے۔ برآمد کنندگان آک پاریر کہ اگہ حکومتی کمکاری برجاسلیس تو صنعت تینا برآمدی لائخی تیٹی نمان ودکی کننگ کیک۔ برجامالی سال (جولائی آن اپریل) اٹی پاکستان نا تمباکو برآمد ات آک 158.35 ملین امریکی ڈالر اسکان سرمسر، ہرافتے ٹی بیلجیئم، متحدہ عرب امارات، یونان، و فلپائن کون آملک آتیٹی خاصی شونداری خننگا۔ جام کمال خان ڈل ءِ باوری کرفے کہ حکومت و نجی بشخ آتا کمک اٹ ملک انا تمباکو برآمدی لائخی تے ودفنگک و برآمد کنندگان آتے غٹ آسراتی تننگک۔
