کوئٹہ۔ 16مئی (اے پی پی) بلوچستان نا مرکزی سینئر راہشون چوہدری نعیم کریم پارینے کہ بھارتی جارحیت نا برخلاف مچ آقوم یکجہتی نا درشانی ءِ کرسا پک کرینے کہ او تینا سلہہ بند فوج انا واکءُ، آپریشن بنیان المرصوص نا سرسہبی آ پاکستان نا الس و پاکستان نا فوج ءِ مبارکبادی ایتنہ اینو پاکستان نا فوج انا بہادری و جیرت ءِ خراج تحسین پیش کننگ نا دے ءِ۔ مسلم لیگ (ن) بلوچستان نا رابطہ آفس آن یوم تشکر نا بابت جاری مروک اسہ بیان اسے ٹی چوہدری نعیم کریم پارے کہ پاک فوج انا آپریشن بنیان المرصوص نا سرسہبی ڈیہہ اٹی بھارت نا مصنوعی عسکری برتری ءِ مش تا کرے اینو مچ آ پاکستانی قوم پاک فوج انا بھارت نا برخلاف جنگ اٹی سرسہبی آ یوم تشکر اڈتننگ ءُ و اللہ تعالیٰ نا شکر گزار ءُ کہ او ننے سرسہب کرے ہراڑآن مچ آپاکستانی قوم انا کاٹم گمر اٹ بڑزمس۔ اوپارے کہ پاکستان 6 و7مئی نا نیامی نن بھارت نا کنڈآن کروک آ فوجی جارحیت نا پبی ورندی ءِ ترسا 3 رافیل جہاز آتون اوار 5 جنگی جہاز آتے خلک بٹے و ولدا 10 مئی آ تینا وتواجہی نا دفاع ءِ کرسا بھارت ءِ ہندن ءُ ورندی اس تس ہرادے نئے بیرہ دنیا امنا کرے ہراڑآنن پاک فوج ءِ خراج تحسین پیش کینہ۔ اوپارے کہ جنگ اٹی مچ آ قوم یکجامرسا تینا پاک فوج اتون تفسا دنیا غا دا پک کرے کہ پاکستان نا الس و فوج تینا ملک انا سالمیت نا دفاع ءِ کننگ ءِ جوان وڑاٹ چارہ و ہروڑنا جارحیت نا پبی ورندی ءِ تننگ ءِ جوان چارہ۔ اوپارے کہ اینو نادے نئے بیرہ ننا سلہہ بند فوج انا قربانی تا مننگ ءِ بلکن مچ آ قوم انا سیوت، یکجہتی و حب الوطنی نا عظیم دروراس ہم ارے۔ اوپارے کہ نن اینونادے تینا پاک فوج و سویلین شہیدآتے خراج تحسین پیش کینہ ہرافک ملک و قوم انا خاطر تینا جون تے ندرکریر اوفتا قربانی تے مدام روشنا انگا لوز آتیٹی یات تخنگک۔
