اسلام آباد۔ 16 مئی (اے پی پی) وزیراعظم محمد شہباز شریف برآمدات و زرکاری نا مون آ دننگ کن تاریخی گام اس ہرفسا درآمدی محصولات (ٹیرف) اٹی پدریسہ ولے نمان کمتی نا منظوری ءِ تسنے و پارینے کہ حکومت سوگو زرگزران نا دوئی کننگ، روزگار نا وارخواہی تا فراوانی و کبینی نا دیرپاو پورو چٹفنگ کن اسہ کسر اسے ہم ہلیپک۔ وزیراعظم آفس نا میڈیا ونگ اناکنڈآن جمعہ نادے آ جاری بیان نا رداٹ وزیراعظم محمد شہباز شریف داخیال آتا درشانی ءِ تینا کماشی ٹی نیشنل ٹیرف پالیسی نا بابت اہم ءُ دیوان اسے ٹی کرے ہرا جمعہ ناد ے آ وزیراعظم ہاؤس اٹی اڈہلک۔ بیان نا رداٹ دیوان اٹی برآمدات و زرکاری نا مون آ دننگ کن درآمدی محصولات آتیٹی نمان کمتی نا فیصلہ ءِ کننگا۔ دیوان اٹی وزیراعظم تینا داعزم انا درشانی ءِ کرے کہ حکومت سوگو زرگزران نا دوئی کننگ، روزگار نا وارخواہی تا فراوانی و کبینی نا دیرپاو چٹفنگ کن اسہ کسر اسے ہم ہلیپک۔ اوپارے کہ ملکی و درملکی زرگزران نا چاہندار آتون جوان سلابت آن پد بنداوی زرگزرانی اصلاحات کن اسہ جوان ءُ ڈٹ اس جوڑ کننگانے۔ بیان نا رداٹ تینا ہندا زرگزرانی بحالی نا ڈٹ آتا چرجوئی ءِ، وزیراعظم اسہ تاریخی گام اس ہرفسا درآمدی محصولات (ٹیرف) اٹی پدریسہ ولے نمان کمتی نا منظوری ءِ تسنے۔ دا گام ءِ زرگزرانی گچینی نا دوئی کننگ نا کنڈآ اسہ اہم ءُ مزل نا نشان اس گوندنگ انگ ءِ ہرا برآمد آتیا تالان شونداری ءِ ممکن کیک۔ دا فیصلہ غان نئے بیرہ بے روزگاری نامون ءِ توننگ اٹ کمک رسینگک بلکن کبینی نا کچ انا ہم توننگ مریک۔ داکان بیدس داٹی جہانی زرکاری ءِ مون آدننگک، ہراڑآن روزگار نا پوسکن ءُ وارخواہی ودی مریک۔ حکومت الس ءِ روزگار نا فراوانی و خاص وڑاٹ خوانوک آ ورناتے باعزت روزگار تننگ کن کوشست کننگ ءِ۔ بیان اٹی پاننگاکہ وزیراعظم ودکی کسٹمز ڈیوٹی(ہراداوخت آ2 درسد آن 7 درسد نا نیام اٹی ءِ) و ریگولیٹری ڈیوٹی(ہرا داوخت آ 5 درسد آن 90 درسد اسکان ءِ) ءِ بروک آ چار آن پنچ سال اٹی پورووڑاٹ چٹفنگ نا پارت کرینے۔ داڑتون اوار اوار اوکسٹمز ڈیوٹی ءِ زیات آن زیات 15 درسد اسکان محدود کننگ نا حق اٹی فیصلہ کرینے، وخت اس کہ فی الحال گڑاس گڑاتیا دا کچ 100 درسد آن ہم متجاوزءِ۔ کسٹمز ڈیوٹی نا کچ(سلیبز) ءِ چار اسکان محدود کننگانے، ہراڑآن درآمد آتا بابت کانودی پیچیدگی تیٹی نمان کمتی بریک و چندی صنعت آتے بریبروارخواہی دُوبننگ کیک۔ بیان نا رداٹ وزیراعظم نا دا تاریخی فیصلہ غان زرگزران درملکی زرکاری کن اوپن مریک و ملکی صنعت آتے خام مال ، نیامی گڑا و سرمایہ جاتی باآسانی و اڑزان نہاد آتیا دوئی مریک۔ داکان بیدس مسابقت اٹی ودکی نا سوب آن ہندی صنعت آک زیات گچین و مسابقتی مریرہ، ہراملک اکن برآمدی کٹیاءِ ودفنگ اٹ کمک ایتک، و ہنداوڑ کبینی و کرنسی نا قدر اٹی کمتی نا مون ءِ توننگ اٹی ہم کمک ملک۔ وزیراعظم داسلاہ نا غٹ پلوآتا خوڑتی اٹ جاچ ءِ ہلک، ٹیرف اٹی کمتی نئے بیرہ برجاکھاتہ نا نسخان ءِ سوگو کیک بلکن کسٹمز ڈیوٹی آن زیات محصولات دوئی کننگ اٹ ہم کمکار مریک۔ بیان اٹی پاننگانے کہ دیوان اٹی وزیراعظم اسہ عملدرآمد کمیٹی اس ہم جوڑ کرینے۔ وزیراعظم اعادہ کرے کہ ملک انا زرگزرانی گچینی اونا اولیت ءِ۔ دیوان اٹی بنجائی وزیر واپار جام کمال خان، بنجائی وزیر اقتصادی اموراحدخان چیمہ، بنجائی وزیر خزانہ ومحصولات محمد اورنگزیب، بنجائی وزیر پیٹرولیم علی پرویز ملک، وزیراعظم نا خصوصی کمکار ہارون اختر و تعلقدار ادارہ غاتا بڑزکو آفیسر آک شریک ئسر۔
