اسلام آباد۔16مئی (اے پی پی): سینیٹر عرفان الحق صدیقی ءَ گوشت کہ گوستگیں کش ءُ چیل ءِ وھد ءَ گندگ بوتگیں راجی یکوئی پاکستان ءِ راجدپتر ءِ یک رژنائیں باب ءِ رنگ ءَ یات کنگ بیت۔ جمعہ ءِ روچ ءَ ایوان بالا ءِ دیوان ءَ سینیٹر عرفان الحق صدیقی ءَ گوشت کہ بھارت ءِ زوراکی ءُ پاکستان ءِ شاندار سوبمندی ءِ جوانیں تک ایش انت کہ مرچی ما ءُ اپوزیشن یکیں تاک ءِ سر ءَ ایں ۔ ھمے راجی یکجاھی اصل سوب مندی اِنت۔ آئی ءَ بھارت ءِ دمگی رویہ ءِ سر ءَ ایراد گرگ ءَ گوشت کہ بھارت ءِ راجدپتر ھمساھگیں ملک آنی گوما نیگی سیادی ءَ چہ پُر اِنت۔ نیپال بہ بیت، بھوٹان بہ بیت، پاکستان یا سری لنکا بہ بیت، ہندوستان ءَ گوں کس ءَ دوستی ءِ سیادی نہ بوتگ۔ سینیٹر صدیقی ءَ پہلگام ءِ وئیل ءِ آزاتیں پٹ ءُ پول ءِ لوٹ ءِ پدا زور دات ءُ گوشت کہ ما بھارت ءَ چہ لوٹ کن ایں کہ آ اے وئیل ءِ شفافیں پٹ ءُ پول ءَ بہ کنت، چیا کہ مئے مزن وزیر ءَ ھم سوج داتگ۔ آئی ءَ گوں ھاسیں ءُ بے دروریں گالوار ءَ گوشت کہ بھارت پاکستان ءَ را ھچبر غزہ ءِ تہ ءَ بدل نہ کنت ءُ اے کلوہ ءَ را بھارت ءَ جوانیں رنگ ءَ وش آتک کتگ۔ پاکستانی قوت آنی بہادری ءُ الس ءِ یکوئی ءَ را ساڑاتگ ءَ آئی ءَ گوشت کہ اے جنگ ءِ وھد ءَ الس ءُ پارلیمنٹ ءِ نیمگ ءَ پیش داشتگیں یکوئی بے درور اِنت۔ مئے اُرد ءَ اے گپ سہرا کتگ کہ جنگ نہ ایوک ءَ گوں سلاہاں جنگ بنت بلکیں گوں واھگ ، دلیری ءُ جزم ءَ ہم جنگ بنت۔
