اسلام آباد۔16مئی (اے پی پی): راجی اسمبلی ءِ اسپیکر سردار ایاز صادق ءَ بھارت ءِ ھلاپ ءَ پاکستان ءِ راجدپتری سوبمندی ءِ سر ءَ راج ءَ را مبارک بات دیگ ءِ وھد ءَ گوشت کہ اللہ تعالیٰ ءِ شکر ءُ منت ھمینچوک بگراں کم انت۔ جمعہ ءِ روچ ءَ شکر گرگ ءِ روچ ءِ موہ ءَ وتی کلوہ ءِ تہ ءَ آئی ءَ ماتیں وطن ءِ دیمپان ءَ وتی جان ندر کنوکیں شہید آناں یات پیش کت ءُ گوشت کہ مئے اُرداں دژمن ءِ پدریں زوراکی ءِ لائکیں پسو دات۔ دلیریں ھاٹیگ آں دژمن ءِ بدیں رھبنداں ناکام کنگ ءَ راج ءَ را شان ءُ شانت کتگ۔ دہ مئی ءَ پد پاکستان ءَ یک نوکیں تازگی ءُ وشی یے مارگ بیت راستی ءِ جُنز ءَ پد پاکستان ءَ دگنیا ءِ تہ ءَ بے دروریں بستارے رس اِتگ۔ آئی ءَ گوشت کہ پارلیمنٹ ءُ الس سلاہ بندیں اُرد ءِ گوما سیس ءِ دیوال ءِ وڑ ءَ اوشتگ ءُ وطن ءِ رکھینگ ءِ واستہ وتی سراں ندر کنگ ءَ ساڑی انت۔ پاکستانی رسانکدر ءُ ورناہاں انصاف ءِ جنگ ءَ مثالی کرد پیلو کتگ، سرجمیں راج ءَ بھارتی زوراکی ءِ وھد ءَ صبر ءُ نظم ءُ ضبط ءِ درشانی کتگ ءُ سیاسی ءُ فوجی سروکی ءَ یکوئی ءِ عملی ثبوت داتگ۔ آئی ءَ گوشت کہ پاک فوج ءَ بھارتی زوراکی ءِ پسو مردینی رنگ ءَ داتگ، شھید آنی قربانی ءَ را راج کدی شموشکار نہ بیت، ملک ءِ رکھینگ ءِ واستہ سرجمیں راج یکوئی ءِ نشان ءِ رنگ ءَ مان بوتگ۔ آئی ءَ گوشت کہ پاک فوج ءِ سپاھیگ آناں اے گپ ثابت کت کہ ھمت ءَ چہ دژمن ءَ را شکست دات کنت، ءُ توامیں سیاسی گل پاک فوج ءِ کش ءَ اوشتاتگ انت، اختلاف آناں چہ برز بوھگ ءَ انت۔ راجی اسمبلی ءِ صدر ءَ سلاہ بندیں اُرد ءِ واستہ نیکیں واھگ آنی درشان کت۔
