اسلام آباد۔ 16مئی (اے پی پی) بنجائی وزیر خزانہ ومحصولات سینیٹر محمد اورنگزیب پارینے کہ موسمیاتی بدلی پاکستان کن وجودی خطرہ غاتیان اسٹ ءِ، گرین سکوک آن دوئی مروک آ فنڈ آتے مچ آملک اٹی دِیر انا ڈٹ آتیکن کاریم اٹ اتنگک، کثیر الجہتی، ہڑتوم آکنڈآتا شریداری و زرکارآک پاکستان اٹ خراج، توانائی، ایس اوایز، نجکاری ، پبلک فنانس و پنشن تون اوار چندی بشخ آتیٹی پنجرجاتی اصلاحات نا چرجوئی ءِ خوارہ۔ جمعہ نادے آ پاکستان نا اولیکو ساورن گرین سکوک بانڈز انا جاری کننگ نا وخت آ تینا تران اٹی اوپارے کہ بنائی وڑاٹ گرین سکوک آن 30 ارب روپئی دوئی کننگک، و داپاکستان اسٹاک ایکسچینج اٹی فہرستی حیثیت اس تخک، جم وام تیٹی اسکوک نا بشخ 14 درسد مسنے، دا بابت نن ملائیشیا نا ماڈل نا پیروی ءِ کننگ خوانہ۔ اوپارے کہ گرین سکوک آن دوئی مروک آ فنڈ آتے مچ آ ملک اٹی دِیر انا ڈٹ آتیکن کاریم اٹ اتنگک، انتئے کہ موسمیاتی بدلی پاکستان کن وجودی خطرہ غاتیان اسٹ ءِ۔ وزیرخزانہ پارے کہ نجی بشخ ملکی زرگزران نابایدے کماشی ءِ کے۔ موسمیاتی بدلی و کلائمیٹ فنانسنگ اٹ نجی بشخ انا کڑد بھاز اہمیت تخک۔ اوپارے کہ نن گچین جہانی وڑوڈول انا رداٹ ڈیبٹ مینجمنٹ آفس نا ری سٹرکچرنگ و اودے دُوارہ منظم کننگ اُن۔ دا چرجوئی ٹی چندی و متنوع فنڈنگ پروجیکٹ مون آ بریک ۔ وزیرخزانہ پارے کہ پاکستان سٹاک ایکسچینج ءِ 100 انڈیکس نا پوسکن آ ریکارڈ آ مبارکبادی پیش کینہ ۔ داڑآن ملکی زرگزران و پاکستان نا پدریسہ سرسہبی تیا زرکارآتا پت انا عکاسی مننگ ءِ، ہرا مچ آملک اٹی یوم تشکر نا بابت پاکستان اسٹاک ایکسچینج نا گچین بناءِ۔ کنے دا یقین ءِ کہ پاکستان وپاکستان اسٹاک ایکسچینج ہڑتوم آتیکن پین جوان ءُ خبربریک، وزیرخزانہ پارے کہ واشنگٹن و لندن اٹی او زوت آتے اٹ کثیر الجہتی ، ہڑتوم آکنڈآتا شریدارو زرکارآتون پدریسہ اوڑدہی کرینے۔ دا اوڑدہی تیان ننے اِرا کلہو ملانے، اولیکو دا کہ کثیر الجہتی ، ہڑتوم آکنڈآتا شریدار و زرکارپاکستان اٹ آجو زرگزران نا سوگوی آن خوش ءُ، اوپاکستانی زرگزران نا سوگوی نا رفتار و نظام الاوقات نا ستاءِ کریر و اوڑآ حیرت نا درشانی ءِ کریر۔ وزیرخزانہ پارے کہ داڑآ او مسکوہی نگران وزیرخزانہ ڈاکٹر شمشاد ءِ کریڈٹ تننگ خواہک ہراعبوری دور اٹی پاکستانی زرگزران کن کسر نا تعین ءِ کریسس، نن پدریسہ ہموکسر نا پیروی ءِ کننگ اُن۔ وزیرخزانہ پارے کہ کثیر الجہتی، ہڑتوم آ کنڈآتا شریدار و زرکارپاکستان اٹی خراج، توانائی، ایس او ایز، نجکاری، پبلک فنانس و پنشن تون اوار چندی بشخ آتیٹی پنجرجاتی اصلاحات نا چرجوئی خوارہ۔ وزیرخزانہ پارے کہ بروک آ مالی سال انا بنجائی بجٹ نا تیاریک برجاءُ و دارداٹ چندی شریدار آتون سلابت و گپ وتران مننگ ءِ۔ ننے دابابت فروری آن سلاہ ملنگ ءِ، اوپارے کہ نن خوانہ کہ بنجائی بجٹ پاکستان کن ہوم گراؤن اقتصادی ایجنڈاغا تالان پاکستانی زرگزران نا تزویراتی سمت انا عکاس مرے۔ وزیرخزانہ گرین سکوک نا جاری کننگ اٹ کمک فراوان کروک آ بینک آتا منت واری ءِہم ہرفے۔
