راولپنڈی/اسلام آباد۔ 16مئی (اے پی پی) صدر مملکت آصف علی زرداری پارینے کہ نن تینا بہادر ورناتا قربانی تیا گمر کینہ، مچ آ قوم تینا سپاہی تا قربانی تے سلام پیش کیک، شہید و اوفتا خاہوت آتاقربانی تا مدام معترف مرینہ ۔ صدر مملکت جمعہ نادے آ بھارت نا برخلاف معرکہ حق اٹی شہید مروک آ اسکواڈرن لیڈر عثمان یوسف شہید نا اُراغا ہنا۔ ایوان صدر نا پریس ونگ آن جاری بیان نا رداٹ سکواڈرن لیڈر عثمان یوسف شہید انا اُراغا بننگ نا وخت آ صدر مملکت شہید انا باوہ و خاہوت نا ایلو بندغ آتون ہڑزخواہی نا درشانی ءِ کرے۔ صدر مملکت شہید انا وطن کن خذمت و وطن نا دفاع ٹی جون ءِ ندر کننگ آ قوم انا کنڈآن اودے شاندار خراج عقیدت پیش کرے۔ داوخت آ صدر مملکت پارے کہ نن تینا بہادر ورناتا قربانی تیا گمرکینہ، مچ آ قوم تینا سپاہی تا قربانی تے سلام پیش کیک، نن تینا شہید و اوفتا خاہوت آتا قربانی تا مدام معترف مرینہ۔ صدر آصف علی زرداری شہید کن دعاپاتیا و درجہ غاتا بڑزی کن دعاکرے۔ اوشہید انا خاہوت تون ہمدردی نا درشانی ءِ کرے و اوفتا صبر وجمیل کن دعاکرے۔
