اسلام آباد۔ 16 مئی (اے پی پی) بنجائی وزیرداخلہ محسن نقوی پارینے کہ بھارتی جارحیت نا برخلاف پاکستان نا شاندار سرسہبی آ اللہ تعالیٰ نا شکرءِ ادا کینہ۔ وطن نا شہید آتے سلام ہرافتا بے مٹ قربانی تا سوب معرکہ حق اٹی سرسہبی نصیب مس، لغور دشمن ہروارآنبار داوار ہم نن نا تہاری ٹی جلہو کرے۔ یوم تشکر آ تینا کلہو اٹی وزیرداخلہ محسن نقوی پارے کہ پاکستان نا بہادر گلزادہ غاک دشمن ءِ عبرتناک سبخ اس ترسا شکست تسر۔ طاقت نا غرور اٹ مست دشمن منہ گھنٹہ غان پد میدان ءِ ہلسا نرا۔ پاکستان نا شاہینک 6 بھارتی جہاز آتے مش تا کرسا فضائی جنگ اٹی پوسکن ءُ تاریخ اس نوشتہ کریر۔ پاکستان نا بہادر سلہہ بند فوج دشمن ءِ خشت انا ورندی ءِ خل اٹ ترسا عظیم سرسہبی نا پوسکن ءُ بشخ اس نوشتہ کرے ۔ محسن نقوی پارے کہ داپاکستان نا فوج اتون خوددارو باوقار پاکستانی قوم انا سرسہبی ءِ ہراڑآ ہر پاکستانی نا کاٹم گمراٹ بڑز ءِ۔ آرمی چیف جنرل سید عاصم منیر، چیف آف ایئر اسٹاف ظہیر احمد بابر و پاک بحریہ نا سروک ایڈمرل نوید اشرف ءِ خراج تحسین پیش کیوہ۔ ہرمسٹ آ سروس آتا چیف آتا پامدار و جیرت مندانہ سرکڑدہ ئی ٹی بہادر گلزادہ غاک دشمن نا ناپاک عزم ءِ مش تا کریر۔
