اسلام آباد۔15مئی (اے پی پی): بنجاھی کانود ءِ وزیر سینیٹر اعظم نذیر تارڑ ءَ گوشت کہ پاکستان ءِ آئین ملک ءِ نظریاتی ءُ جغرافیائی یکوئی ءِ ضمانت انت ءُ اے ریاستی ادارگ آنی یکجائی ذمہ واری انت کہ آ ہر قیمت ءَ ایشی ءِ بالادستی ءَ را برجائی بہ کن انت۔ پنچ شمبے ءِ روچ ءَ ایوان بالا ءِ دیوان ءَ اعظم نذیر تارڑ ءَ گوشت کہ خیبر پختونخوا ءَ صوبائی اسمبلی ءِ گچین کاری ءِ آسر نہ بوھگ ءِ مستریں سبب اودا صوبائی اسمبلی ءِ وھد ءِ سر ءَ دیوان نہ گرگ انت۔ آئی ءَ گوشت کہ اے معاملہ نوں آمید گس ءَ گوشدارگ بوھگ ءَ انت ءُ سئے شمبے ءَ آمید گس ءِ 13باسکی بنچ کیس ءِ گوشدارگ ءَ انت۔ بنجاھی کانود ءِ وزیر ءَ گوشت کہ چیئرمین اسٹیم ءَ اے درگت ءَ وتی کرد پیلو کتگ ءُ اے جیڈھ الیکشن کمیشن ءَ دیم داتگ ات بلے نوں اے جیڈھ الیکشن کمیشن ءِ گوما انت ءُ آ ایشی ءَ را براہ راست ہدایت دات نہ کنت۔ اعظم نذیر تارڑ ءَ خیبر پختونخوا ءِ سرکار ءِ سر ءَ ایراد گپت ءُ گوشت کہ آ سینیٹ ءِ گچین کاری ءِ واستہ شنگ بوتگیں شیڈول ءِ احترام ءَ نہ کن اَنت، ایشی ءِ سبب ءَ اودا الس ءِ نمائندہ انگت ءَ بالائی ایوان ءَ ھوار نہ اَنت۔ آئی ءَ اے گپ پدر کت کہ خیبر پختونخوا ءِ صوبائی گچین کاری ءِ سیادی گوں قانونی جیڈھ ءُ کیساں انت کہ نوں آمید گس ءِ نیمگ ءَ پیسلہ کنگ بیت۔ وزیر ءِ کانود ءَ اے گپ ءِ سر ءَ زور پر دات کہ توامیں ادارگ وتی زمہ واری ءَ وھد ءِ سر ءَ پیلو بہ کن اَنت تانکہ جمہوری عمل ءِ تہ ءَ اڑاند مہ بیت ءُ ایوان بالا ءَ سرجمی ءَ نمائندگی بوت کنت۔ اے موہ ءِ سر ءَ اعظم نذیر تارڑ ءَ نمیرانیں سینیٹر تاج حیدر ءَ را توسیپ ءُ ستا پیش کت۔ آئی ءَ ایوان ءِ نوکیں باسک وقار مہدی ءَ را وش اتک کت ءُ امیت سہرا کت کہ ایوان ءِ کارکردگی ءَ را گہتر کنگ ءِ واستہ وتی تجربت ءَ را کارمرد کنت۔
