اسلام آباد۔ 15 مئی (اے پی پی) صدر آزاد کشمیر بیرسٹر سلطان محمود چوہدری پارینے کہ ڈیہہ اٹی امن کن امریکہ نا کوشست خاص کر امریکی صدر ڈونلڈ ٹرمپ انا وخت آ نیام تمنگ آن سویلی ایشیا اسہ بھلو سانحہ سے آن بچانے، نن کشمیر نا ویل آ بھارت وپاکستان ءِ ثالثی نا پیشکش آ امریکی صدر ڈونلڈ ٹرمپ انا خصوصی منت واری ءِ ہرفنہ و دا پیش کش نا است انا حُب اٹ خیرمقدم ءِ کینہ۔ داخیال آتا درشانی ءِ او اینو داڑے ایوان ءِ صدر کشمیر ہاؤس اٹی پاکستان اٹ امریکی سفارت خانہ نا پولیٹیکل قونصلر زیچرے ہرکنر ائیڈرتون اسہ اوڑدہی اسے ٹی کرے ۔ داوخت آ امریکی سفارت خانہ نا عہدیدار الزبتھ ہم ساڑی ئس۔ داوخت آ صدر آزاد کشمیر امریکی سفارت خانہ نا عہدیدار آتے کشمیر نا ویل و بھارت نا غیرکانودی کوزہ ٹی جموں وکشمیر نا تازہ انگا حالیت آتیان معلومدار کرے۔ اوپارے کہ بھارت داوخت آ ہبکئی ٹی غیرسنجیدہ ءُ حرکت اس کننگ کیک۔ پاکستان و بھارت ہڑتوم آک ایٹمی واکدار ءُ و ہڑتوم آ نیام اٹ چنکوو بھلو شکست اس ہمو جنگ انا پیش خیمہ مننگ کیک ہرا مچ آ دنیا نا امن ءِ تینا پلویڑ اٹی ہلنگ کیک، ہنداسوب آن امریکہ بھارت آ زور شاغے کہ او گام آن باز سلے۔ بیرسٹر سلطان محمود چوہدری پارے کہ نن امریکی وزیرخارجہ مارکووبیونا ہم منت واراُن کہ او ہم دا چرجوئی ٹی اہم کڑد ادا کرے۔ بیرسٹر سلطان محمود چوہدری مستی پارے کہ امریکہ کشمیر نا ویل آ ثالثی کے ودا چرجوئی ٹی کشمیری الس ءِ اقوام متحدہ نا قرارداد آتا رداٹ اوفتا حق خودارادیت ترفنگ کن تینا کڑد ءِ اداکے۔
