اسلام آباد۔ 15مئی (اے پی پی) بنجائی وزیر توانائی سردار اویس احمد خان لغاری پارے کہ بجلی نا صارف آتیکن اسہ سال انا مد اٹی بجلی نانہاد اٹی بھلو کمتی اس کننگانے، 200 یونٹ آتیان کم صارف آتیکن بجلی نا نہاد اٹی 57 درسد، صنعتی صارف آتیکن 31 درسد و کشاری صارف آتیکن ٹیرف 20 درسد کم مسنے۔ پنچ شنبے نادے آ قومی اسمبلی نا دیوان اٹی وقفہ سوج آتیٹی طاہرہ اورنگزیب نا سوج آ بنجائی وزیر توانائی سردار اویس احمد خان لغاری ایوان ءِ پارے کہ ننا جم صارف آتا کچ مسہ کروڑ 90 لکھ نا خڑک ءِ، دافتیان اسہ کروڑ 80 لکھ صارف 200 یونٹ آتیان کم بجلی کاریم اٹ اتیرہ، دا صارف آتیکن بجلی نا نہاد اٹی کم و ود 57 درسد نا کمتی کننگانے۔ صنعتی صارف آتیکن ٹیرف اٹی 31 درسد نا کمتی کننگانے ہرانا سوب آن صنعت آتا طلب اٹی ودکی مسنے، بیرہ فیصل آباد اٹی صنعت آتیکن بجلی نا طلب اٹی 35 درسد ودکی مسنے، دا حکومت نا گچین پالیسی تا بھرم ءِ۔ اوپارے کہ مہالو کشاری صارف آتے سبسڈی تننگاکہ، دا سبسڈی ءِ چٹفنگانے، وزیراعظم فیول کاسٹ ایڈجسٹمنٹ نا منظوری ءِ تس ہرانا سوب آن کشاری صارف آتیکن بجلی نا نہاد 20 درسد کم مسنے۔ حکومت آئی پی پیز آتون مسہ نیم ہزار ارب روپئی کن معاہدہ کرے، دا زر ءِ ایڈجسٹ کننگا، ہنداوڑ پیٹرولیم ڈویلپمنٹ لیوی نا فائدہ ہم صارف آتے سرکننگا اگہ دا رجحان برجاسلیس تو اسہ سال اٹی پاکستان ڈیہہ اٹی غٹ آن گچین مسابقتی بجلی فراوان کروک آملک جوڑ مریک۔ اوپارے کہ داوخت آ بروک آ مسہ سال اکن 7 ہزار میگاواٹ ودکی بجلی ساڑی ءِ، حکومت 21 آن ہلیس 22 روپئی فی یونٹ اسکان بجلی نا فراوانی کن تیار ءِ، وزارت خزانہ شونداری شریدار آتون دا بابت گپ وتران کننگ ءِ ، داڑآ سبسڈی نا خڑچ ہم بفک۔ شاہدہ رحمانی نا ضمنی سوج آ او پارے کہ کراس سبسڈی ساڑی ءِ ولے نن مڈل کلاس کن ہم ٹیرف اٹی کمتی کننگانے، 200 آن ہلیس 300 یونٹ اسکان صارف آتیکن نہاد آتیٹی 20 درسد و 300 آن ہلیس 400 یونٹ اسکان صارف آتیکن ٹیرف اٹی 14 درسد کمتی کننگانے۔
