پارلیمانی سیکرٹری صبا صادق ءِ گشگ انت کہ زالبولانی جاور ھال ءِ نیشنل کمیشن  فار دی سٹیٹس آف ویمن   ءِ اگدہ  ءِ ھاتر ءَ سمری پیش کنگ بوتگ

اسلام آباد۔15مئی  (اے پی پی): راجی اسمبلی ءَ را ھال دیگ بوتگ کہ زالبولانی جاور ھال ءِ راجی کمیشن ءِ چیئرپرسن ءِ واستہ خلاصہ روان دیگ بوتگ ءُ کمیشن ءِ چیردستی ءَ صنفی برابری ءِ رپورٹ شنگ کنگ بوتگ۔ پنچ شمبے ءِ روچ ءَ راجی اسمبلی ءَ جست ءُ پرس ءِ وھد ءَ ڈاکٹر شازیہ صوبیہ ءِ جست ءِ سر ءَ پارلیمانی سیکرٹری صبا صادق ءَ ایوان ءَ گوں تران کنان ءَ گوشت کہ زالبول ملک ءِ نیم آبادی ءِ جوڑ کن اَنت ءُ آھانی ھک آئین، قرآن ءُ سنت ءَ داتگ اَنت۔ زالبولانی حیثیت ءِ بابت ءَ نیشنل کمیشن ءِ چیئرپرسن ءِ واستہ سمری روان دیگ بوتگ، اے وھد ءَ چیئرپرسن عبوری بنیاد ءَ کار کنگ ءَ انت، نوکیں گچینکاری ءِ عمل زوت سرجم کنگ بیت، کمیشن ءِ بورڈ کار کنگ ءَ انت، ایشی ءِ دیوان باقاعدہ برجم دارگ بوھگ ءَ انت۔ آئی ءَ گوشت کہ این سی ایس ڈبلیو ءِ کار سک باز انت، ادارگ ءِ کار زالبول آنی جیڈھ آنی گیواری کنگ انت، زالبول آنی سر ءَ ھمک وڑیں زوراکی ءِ گر ءُ دار ھم کمیشن ءِ ذمہ واری انت۔ آئی ءَ گوشت کہ کمیشن ھمگرنچیں صوبائی وزارت آنی گوما باقاعدہ گند ءُ نند کنت، درستیں صوبگ ایشی ءِ گوما ڈیٹا شیئر کنگ ءَ انت۔ آئی ءَ گوشت کہ اے ادارگ ءِ پبلسٹی ءِ تہ ءَ ترندی کنگ بہ بیت ءُ زالبول ھم بہ زان اَنت کہ وتی ھک آنی رکھینگ ءِ واستہ ادارگ ھست، کمیشن ءِ نیمگ ءَ ھیلپ لائن ھم جوڑ کنگ بوتگ۔ نفیسہ شاہ ءِ یک تکمیلی جست ءِ سر ءَ آئی ءَ گوشت کہ بنجاھی حکومت ءِ تہ ءَ زالبول آنی کوٹہ ءِ ھوالگ ءَ اعداد و شمار آنی بابت ءَ ایوان ءَ را سرپدی دیگ بیت، مئے ھیال ءَ زالبول آناں وتی حق رسگ لوٹ ایت۔ زرتاج گل ءِ تکمیلی جُست ءِ سر ءَ آئی ءَ گوشت کہ اگاں کجام ھم پاکستانی شہری بہ بیت مردین یا جنین کانود ءِ ھلاپ ورزی بہ کنت گڈا آئی ءِ ھلاپ ءَ کانود ءِ کارروائی کنگ بیت۔ نزهت صادق ءِ تکمیلی جُست ءِ سر ءَ آئی ءَ گوشت کہ کمیشن ءِ باسک جیل آنی تر ءُ تاب ءَ کن اَنت ءُ اودا نندوکیں جنین آدم آنی گوما گند ءُ نند کن اَنت۔ قانونی کمک ءَ ابید زالبولیں زندانیان ءَ را آسراتی دیگ ءِ ھاتر ءَ ھم گامگیج زورگ بیت۔ آئی ءَ گوشت کہ کمیشن ءِ چیردستی ءَ صنفی برابری ءِ رپورٹ شنگ کنگ بوتگ ایشی ءِ تہ ءَ سرجمیں ڈیٹا ھوار انت۔ اے رپوٹ زوت پارلیمنٹ ءَ پیش کنگ بیت۔