اسلام آباد۔ 15مئی(اے پی پی) وزیرخزانہ محمد اورنگزیب پارینے کہ سکھر۔ حیدرآباد موٹروے اہم ءُ ڈٹ اسے، دا ڈٹ ءِ بروک آ بجٹ اٹ ہرحال اٹ اوار کینہ، وخت اس کہ ڈپٹی اسپیکر حکومت ءِ پارت کرینے کہ وزیر ڈٹ بندی جمعہ نا دے آ ایوان اٹی برسا دا ڈٹ انا بارواٹی باسک آتے معلومدار کے۔ پنچ شنبے نادے آ قومی اسمبلی ٹی شرمیلا فاروقی، ڈاکٹر شازیہ صوبیہ، ڈاکٹر نفیسہ شاہ، رفیع اللہ و اسد عالم نیازی نا مالی سال نا مالی سال 2024-25نا سرکاری بشخ انا شونداری پروگرام اٹی حیدر آباد۔ سکھر موٹروے ڈٹ ءِ اوار کپننگ نا بابت چکاری نوٹس نا ورندی ءِ ترسا وزیر مملکت ڈٹ بندی، شونداری و خصوصی گام گیج و ارمغان سبحانی نا کنڈآن پاننگاکہ دا اہم ڈٹ داٹی آذربائیجان ہم است خواہی ہلنگ ءِ، پاکستان نا پنچ بھلا ڈٹ آتیٹی دا اوار ءُ ، داوخت آملک اٹی ہراموٹرویک جوڑ مسنو او ننا جماعت مسلم لیگ ن و نواز شریف جوڑ کرینے، بروک آ بجٹ اٹی دا ڈٹ اکن پی ایس ڈی پی ٹی ہم بجٹ تخنگک، داڑکن پبلک پرائیویٹ شریداری و درملکی فنڈنگ آ ہم کاریم مننگ ءِ۔ ارمغان سبحانی پارے کہ 2023-24نا پی ایس ڈی پی ٹی دا ڈٹ اوار ئس، بدبختی اٹ اوڑآ کاریم بناکننگ کتو، داوخت آ وزیراعظم شہباز شریف پنچ اولیتی ڈٹ آتا گچین کاری ءِ کرینے و داٹی سرفہرست سکھر۔ حیدر آباد موٹروے نا ڈٹ ءِ۔ وزارت مواصلات ہم بروک آ مالی سال نا پی ایس ڈی پی ٹی دا ڈٹ اکن 10 ارب روپئی نا ڈیمانڈ کرینے۔ دا ڈٹ پی ایس ڈی پی نا بشخ مریک و اولیت بنداوتیا جوڑ مریک۔ سید حفیظ الرحمان ایم کیو ایم نا کنڈآن ہم دا ڈٹ انا پی ایس ڈی پی ٹی تخنگ نا خواست کرے۔ ڈاکٹر طارق فضل چوہدری ءِ ڈپٹی اسپیکر پارے کہ او جمعہ غا برسا دا بارواٹی باسک آتا گڑتی تے مرکے۔ ڈاکٹر طارق فضل پارے کہ فیصل آباد موٹروے ہم اِرا رویہ ءِ۔ پیپلزپارٹی و ایم کیو ایم ننا سیوتی ءُ نن دا ایوان نا جاگہ غا اواری اٹ تولسا دادے ایسر کینہ۔ حکومت پیٹرولیم مصنوعات نا نہاد آتیٹی کمتی نا فائدہ الس ءِ تننگ نا جاگہ غا بلوچستان اٹی موٹروے کن 100 ارب روپئی تخنگانے، حیدر آباد سکھر موٹروے پی ایس ڈی پی ٹی اوار ئس ولے عملدرآمد مننگ کتو۔ وزیر مملکت ارمغانی سبحانی پارے کہ حیدر آباد سکھر موٹروے بنجائی حکومت نا اولیتی ڈٹ آتیٹی اوار ءِ، آذربائیجان تون اوار ایلو ملک آک زرکاری ٹی ہم است خواہی ہلنگ ءُ۔ پارلیمانی سیکرٹری گل اصغرخان پارے کہ ڈٹ آ پیش رفت نا بابت حوال تسونن فنانشل کلوز مس۔ ارمغان سبحانی پارے کہ اولیتی بنداو تیا پنچ ڈٹ آتے فہرست اٹی تخنگا۔ وزیر مملکت ارمغانی سبحانی پارے کہ اولیتی بنداو تیا ڈٹ آتیٹی پنجاب نا بیرہ اسہ ڈٹ اس اوار ءِ، باوری کرفنگ اُٹ، سکھر حیدرآباد کراچی ڈٹ اولیت آتیٹی اوار ءِ، دا وخت آ پی پی نا باسک آک اوڑآ برانز کریر۔ نوید قمر پارے کہ ننا اعتراض داہیت آ اف کہ حکومت سنجیدہ ءِ یااف، ننا اعتراض ءِ ، پی ایس ڈی پی ٹی انت اکن اوار اف۔ اعجاز جاکھرانی پارے کہ ای مواصلات کمیٹی نا چیئرمین اُٹ، ہراتم پی ایس ڈی پی ٹی اوار مفک تو ڈٹ امر پورو مریک۔ وزیرخزانہ محمد اورنگزیب نیام تمسا پارے کہ داسہ بجٹ تیاری نا ریسہ غاتیٹی ءِ، نن ڈٹ بندی نا وزیر تون سکھر کراچی موٹروے آ ہیت کینہ۔ وزیرخزانہ پارے کہ داٹی ہچ ءُ شک اسے نا گنجائشت اف کہ سکھر کراچی لائف لائن ڈٹ اسے، دا ڈٹ ننا حکومت نا اولیت ءِ۔ اوباوری کرفے کہ انتس کہ کروئی تما دا ڈٹ ءِ بجٹ اٹ اوار کینہ۔
