اسلام آباد۔ 15مئی (اے پی پی) وزیراعظم نا خصوصی کمکار ہارون اختر پارینے کہ بروک آ بجٹ اٹی الس و صنعت کار آک جوان ءُ خبر بنرہ، بجٹ اٹی پیٹرول، بجلی نا نہاد و شرح سود پین کم مریرہ۔ میڈیا تون گپ وتران کرسا ہارون اختر پارے کہ وزیراعظم شہباز شریف نا زرگزرانی سرجزآک نواز شریف نا وژن نا ڈیک ءُ، او زرگزرانی شونداری نا کچ ءِ 7 درسد اسکان سرکننگ خواہک، و دا کچ ءِ 10 سال اکن سوگو تخنگ نا خواہندار ءِ۔ خصوصی کمکار پارے کہ وزیراعظم برآمد آتیٹی ودکی ءِ زرگزرانی شونداری نا لائف لائن گوندک، و زرگزرانی باندات آتیا پبی چکار کرینے۔ ہارون اختر وزیراعظم نا حکمت عملی نا بابت پارے کہ زرگزرانی مشکل آتیکن شہبا زشریف جتا جتا کمیٹی جوڑ کرسا ویل آتے ایسر کننگ انگ ءِ، وزیراعظم زرگزرانی ویل آتا ایسری نا ٹاسک تننگ آن پد اوڑآ پوچھ گچھ کیک۔ اوپارے کہ وزیراعظم شہباز شریف زرکارآتے رکھ وپت تننگ خواہک، و پاکستان ءِ ڈیہہ اٹی زرکاری نا جنت جوڑ کننگ خواہک، ملک اٹی کاروبار چلینگک تو شونداری مریک۔ اونا پاننگ ئس کہ حکومت صنعت آتے ریلیف تننگ کن بجٹ نا انتظار ءِ کتو، بجٹ آن مست ہی صنعت آتا بجلی نا ریٹ ءِ کم کننگا و بنداوی شرح سود اٹی کمتی کننگا۔ ہارون اختر پارے کہ جہانی منڈی ٹی پیٹرول نا ریلیف الس آ گدریفنگ انگ ءِ، وزیراعظم شہباز شریف جنگی حالیت آتیٹی ہم زرگزرانی امور آ کمیٹی تا دیوان نا کماشی ءِ کرے، و بروک آ بجٹ مالی سال انا بجٹ وزیراعظم نا زرگزرانی وژن نا عملی دروشم مریک۔
