اسلام آباد۔ 14مئی (اے پی پی) اسپیکر قومی اسمبلی سردار ایاز صادق چارشنبے نادے آ سی ایم ایچ راولپنڈی نا دورہ ءِ کرے و معرکہ حق اٹی ٹھپی مروک آ پاک فوج انا ورناتا جان پڑسی ءِ کرے۔ اسپیکر قومی اسمبلی ٹھپی ورناتا طب انا اَرفے و اوفتا زوت دراخ جوڑی کن دعاکرے۔ سردار ایاز صادق پاک فوج انا ٹھپی ورناتا جیرت و بہادری ءِ خراج تحسین پیش کرے۔ اسپیکر قومی اسمبلی سردار ایاز صادق معرکہ حق انا شہید آتے خراج عقیدت پیش کرے و پارے کہ معرکہ حق انا شہید و غازیک ننا پیشانی نا جھومر ءُ۔ قوم تینا شہید آتا قربانی تے اسُل است آن دپک۔ اسپیکر قومی اسمبلی سلہہ بند فوج انا کسبی مہارت نا ستاءِ کرے و پارے کہ پاکستان نا سلہہ بند فوج مکار دشمن ءِ دندان شکن ورندی تس۔ پاک فوج انا ورناک تینا جون تا پرواہ ءِ کپرسا لمہ وطن نا دفاع ءِ کریر۔ قوم تینا سلہہ بند فوج آ گمر کیک۔ ننا سلہہ بند فوج ہرپڑآ دشمن ءِ پسپامننگ آ بیوس کرے۔ پاکستان نا فوج لمہ وطن نا دفاع نا خاطر عظیم قربانی تس۔ مچ آ قوم سلہہ بند فوج اتون سوگو ءُ دیوال اسے آنبار سلوک ءُ۔ پاک فوج انا ساڑی گری ٹی دشمن ملک انا کنڈآ خراب انگا نظر اٹ ہُننگ نا جیرت کننگ کپک۔ پاکستان نا فوج ءِ دنیا ٹی یکتا ہند اس دوئی ءِ۔ مچ آ قوم معرکہ حق انا ٹھپی تا زوت دراخ جوڑی کن دعاکننگ ءِ۔
