اسلام آباد۔ 14مئی (اے پی پی) پیپلزپارٹی نا باسک شازیہ مری پارینے کہ ننا سلہہ بند فوج بھارتی جارحیت آ دشمن ءِ پبی ورندی ترسا ننا کاٹم ءِ گمر اٹ بڑز کرے، پاکستان نا زالبول آک ہم لمہ وطن نا رکھ اکن سلہہ بند فوج اتون ہم کوپہ سلرہ۔ چارشنبے نادے آ قومی اسمبلی ٹی اعتراضی ٹک آ اوپارے کہ قوم اسہ وار ولدا ہرا عزم انا درشانی ءِ کرے او ستاکڑزک اوڑآ مچ آ قوم ءِ مبارکبادی پیش کینہ ۔ داایوان اٹی ہر اسٹ محب وطن ءِ و پاکستان کن جوزہ تخک۔ قوم پک کرے کہ خراب انگا نظر اٹ وطن نا کنڈآ ہروک آتے یکجا مرسا ورندی تسونن۔ اوپارے کہ جنگ بندی جوان ءُ گام اسے، نن جنگ خواپنہ۔ پاکستان جہانی کانود نا ہچ ءُ خلاف ورزی اس کتنے و سویلین ءِ شست کتنے۔ نن ہمو غٹ مخلوق ءِ خراج تحسین پیش کینہ، آرمڈ فورس گچین کڑد ادا کرینے۔ بھارتی جارحیت آ اوفتا حوصلہ، عزم و مہارت ءِ سلام پیش کینہ ۔ پاکستان نا فوج ننا کاٹم ءِ گمر اٹ بڑزکرے۔ دا ملک انا دفاع کن پاکستان نا زالبول آک ہم ہم کوپہ سلرہ۔ اوپارے کہ نن تینا سنگت ملک، اقوام متحدہ و امریکہ نا جنگ بندی کن کوشست آتا ستاءِ کینہ۔ شہید بھٹو و بے نظیر بھٹو پاکستان نا دفاع ءِ ناقابل تسخیرکریر۔ پہلگام واقعہ غان پد بیدی شاہدی آن انڈیاپاکستان آ دوبہ خلک، ولدا بلااشتعال جارحیت کرے۔ اوفتا جہاز آتا بھسکاری نا اعتراف داسہ تینٹ اونا میڈیا ہم کننگ ءِ۔ بھارتی میڈیا زرد صحافت نا بدترین درور اس کرے داسہ اودے کچرا پاننگ انگ ءِ۔ ننا میڈیا زمواری نا درشانی ءِ کرے۔
