اسلام آباد۔ 14مئی (اے پی پی) اسٹیٹ بینک آف پاکستان (ایس بی پی) ءِ جہانی مالیاتی فنڈ (آئی ایم ایف) نا ودکی فنڈ آسراتی پروگرام نا رداٹ 760 ملین اسپیشل ڈرائنگ رائٹس یعنی کم و ود1.023ارب امریکی ڈالر نا ارٹ میکو قسط موصول مسنے۔ اسٹیٹ بینک انا کنڈآن جاری اعلامیہ نا رداٹ دا قسط ءِ آئی ایم ایف نا کنڈآن پاکستان نا اقتصادی کارکڑد آ ات جمی و پروگرام نا ہدف آتا دوئی کننگ ءِ مون آ تخسا جاری کننگانے۔ دا زر انا مسخت پاکستان نا زرمبادلہ نا کوڑی تے گچین کننگ و ملکی زرگزران نا سوگوی ٹی کمک فراوان کننگ ءِ۔ دا زر ءِ سٹیٹ بینک انا درملکی زرمبادلہ نا کوڑی تیٹی اوار کننگک و دا ودکی 16 مئی 2025 آ چٹوک آ ہفتہ نا کوڑی تیٹی ظاہرمریک۔ داقسط انا وصولی آن اسٹیٹ بینک انا کوڑی تیٹی خاطرخواہ گچینی گمانی ءِ ہرا پیشن نا ادائیگی تا گرج آتے پورو کننگ و مالیاتی سوگوی ءِ مون آ دننگ اٹ کمک ایتک۔ اسٹیٹ بینک دا پیش رفت ءِ پاکستان نا زرگزران آ جہانی پت انا نشانی تکک و اومیت تخک کہ داڑآن نئے بیرہ مالیاتی پالیسی ءِ سوگوی ملک بلکن زرکارآتا پت اٹی ہم ودکی مریک۔
