اسلام آباد۔13مئی (اے پی پی): پاکستان ءُ ویتنام ءِ پارلیمانی دوستی گروپ(پی ایف جی) ءِ بنداتی بریفنگ سیشن پارلیمنٹ گس ءَ ایم این اے ءُ انسانی حقانی پارلیمانی سیکرٹری صبا صادق ءِ سروکی ءَ برجم دارگ بوت۔ دیوان ءَ باسک آسیہ ناز تنولی، شہناز سلیم ملک، کرن حیدر، اختر بی بی ءُ شائستہ خان ءَ بہر زرتگ ات۔ وزارت انسانی حقانی نیمگ ءَ چہ جاڑی بوتگیں پریس ریلیز ءِ رد ءَ ویتنام ءَ پاکستان ءِ سفیر، تجارت ءُ سرمایہ کاری ءِ اٹیچی ءُ وزارت ءِ درئی کار ءُ تجارت ءِ کارندہ آں دو نیمگی سیادی، تجارت، سرمایہ کاری ءُ مذہبی سیل ءُ سواد ءِ ھوالگ ءَ بریفنگ داتگ۔ پاکستان ءُ ویتنام ءِ پارلیمانی دوستی گروپ ءِ کنوینر صبا صادق ءَ پاکستان ءِ بودائی ورثہ ءَ گوں سیادی داروکیں مذہبی سیل ءُ سواد ءِ دیمروئی ءِ واستہ کمک ءَ را گیش کنگ ءِ اوست آنی بابت ءَ سر ءَ زور پر دات۔ آئی ءَ گوشت کہ پارلیمانی نیام ءَ سیادی ءَ را مھکم کنگ ءَ ھوار اقتصادی ءُ ثقافتی شوبگ آنی تہ ءَ کمک ءَ را گیش دیمروئی دیگ ءِ ضلورت اِنت۔ باسک آں پاکستان ءُ ویتنام ءِ نیام ءَ دو نیمگی سیادی ءَ را گیش گہتر کنگ، سفارتی کوشست آناں کمک کنگ ءُ مردم آنی نیام ءَ ءُ پارلیمانی کمک ءَ را گیش مھکم کنگ ءِ واستہ وتی جزم ءِ پدا زور دات۔
