اسلام آباد۔13مئی (اے پی پی): مزن وزیر محمد شہباز شریف ءَ پنت ءُ شون کتگ کہ ٹیکس چوری ءِ تہا ہواریں مردم ءُ شعبہ آنی حلاف ءَ مھکمیں گامگیج زورگ بہ بیت، ٹیکس چوری ءِ کمک کنوکیں افسر ءُ اہلکار آناں ہم سکیں احتساب کنگ بہ بیت، ٹیکس چوری ءِ گر ءُ دار ءِ واستہ نوکیں تکنیک ءُ روش کارمرز کنگ بہ بنت۔ سئے شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءِ سروکی ءَ ایف بی آر ءِ ٹیکس ءِ دائرہ کار ءِ تہ ءَ گیشی ءُ ٹیکس آمدنی ءِ تہ ءَ گیشی ءِ سر ءَ چار ءُ تپاسی ءِ دیوان برجم دارگ بوت۔ اے موہ ءِ سر ءَ مزن وزیر ءَ رواں مالی سال ءِ واستہ ایف بی آر ءِ آمدنی ءِ ٹارگٹ آنی سرجمی ءِ نیمگ ءَ ترندی ءَ گوں گامگیج زورگ ءِ واستہ حکومت ءِ اقتصادی ٹیم ءِ کوشست آنی توسیپ کت ءُ گوشت کہ ھما مردم ءُ شوبگ آنی تہ ءَ ٹیکس دیگ ءِ گنجائش است ءُ ٹیکس نہ دیگ ءَ انت آھاں ٹیکس نیٹ ءِ چیر دستی ءَ آرگ بہ بیت۔ مزن وزیر ءَ پنت ءُ شون کت کہ ٹیکس چوری ءَ ہواریں مردم ءُ شوبگ آنی حلاف ءَ سک باز کارروائی کنگ بہ بیت، ٹیکس چوری ءَ کمک کنوکیں افسر ءُ اہلکار آناں ھم سکیں احتساب کنگ بہ بیت، ٹیکس چوری ءَ را گر ءُ دار ءِ واستہ نوکیں ٹیکنالوجی ءِ کارمرد کنگ بہ بیت۔ مزن وزیر ءَ گوشت کہ ٹیکس آمدنی ءِ تہ ءَ گیشی حکومت ءِ اولی ترجی اِنت، ءُ ما لوٹ آں کہ ٹیکس ءِ شرح ءَ را کم کنان ءَ عام مردم ءِ سر ءَ بوجھ ءَ را کم کنگ بہ بیت۔ مزن وزیر ءَ پنت ءُ شون کت کہ تمباکو ءُ ایندگر شوبگ آنی تہ ءَ اے سال ءِ جون ءَ تاں تفصیلی نگرانی سرجم کنگ بہ بیت، تمباکو ءِ شوبگ ءَ ٹیکس ءِ آمدنی پیداک کنگ ءِ واستہ صوبگ آنی گوما کمک ءَ گامگیج چست کنگ بہ بیت، ملک ءُ راج ءَ را زیر التواء کیس آناں جوانیں رنگ ءَ کارروائی کنگ ءَ چہ ٹیکس ءِ آسراتی ءَ را پجارینگ بہ بیت۔ آئی ءَ گوشت کہ ھدا ءِ فضل ءُ کرم ءَ چہ ملک ءِ معیشت ساڑی انت ءُ دیمروئی ءِ نیمگ ءَ روگ ءَ انت۔ راجی دیمروی ءِ واستا ہرکس ءَ وتی ذمہ واری پیلو کنگی انت۔ آئی ءَ دیوان ءَ گوشت۔ گشگ بوھگ ءَ اِنت کہ سرجمیں ملک ءَ سیمنٹ پلانٹ آنی تہ ءَ ٹریک اینڈ ٹریس سسٹم ءِ سرجمیں رنگ ءَ کارمرد کنگ ءَ چہ ٹیکس ءِ آمدنی ءَ ارباں کلدار گیش کنگ ممکن بوتگ۔ دیوان ءَ را گیش گوشت کہ پنیر ءِ صنعت ءَ اے نظام ءِ سر ءَ عمل کنگ ءِ آسر ءَ نومبر 2024ءَ چہ اپریل 2025ءَ ٹیکس ءِ آمدنی ءَ 35درسد گیشی بوتگ۔دیوان ءَ گوشت کہ مزن وزیر ءِ نیمگ ءَ بندات کتگیں اصلاحات آنی سبب ءَ ایف بی آر ءَ جی ڈی پی ءِ 10.6درسد آمدنی ءِ ٹارگٹ سرجم کتگ۔ دیوان ءَ وفاقی وزیر اعظم نظیر ترار، محمد اورنگزیب، احد خان چما، عطا اللہ ترار، چیئرمین ایف بی آر ءُ ہمگرنچیں مزنیں کارندہ آں بہر زرتگ۔
