اسلام آباد (اے پی پی) وفاقی وزیر اھوالکاری ءُ شنگکاری عطا اللہ ترار ءَ گوشت کہ پاکستان ءُ ھندوستان ءِ نیام ءَ جنگ بندی جتاجتائیں ملک آنی جوانیں سفارتی کوشست آنی آسر انت۔ اسکائی نیوز ءَ گوں تران کنان ءَ وفاقی وزیر برائے اھوالکاری ءَ گوشت کہ پاکستان ءِ مزن وزیر ءَ امریکی صدر ڈونلڈ ٹرمپ ءِ ھاسیں منت واری ءِ درشانی کتگ آئی ءَ کش ءُ چیل ءِ کم کنگ ءَ ھاسیں کرد پیلو کتگ۔ آئی ءَ گوشت کہ پاکستان ءُ بھارت ءِ نیام ءَ جنگ بندی ءِ دلالی ءَ چین، سعودی عرب، متحدہ عرب امارات، ترکی ءُ قطر ءَ ھم ھاسیں سفارتی کرد پیلو کتگ۔ یک جست ءِ سر ءَ وفاقی وزیر ءِ اھوالکاری ءَ گوشت کہ امریکی صدر ءِ نیمگ ءَ جاڑی بوتگیں دومی ٹویٹ کشمیر ءِ جیڈھ ءِ گیواری ءِ واستہ امریکہ ءِ واھشت ءِ پدریں درشان اِنت۔ صدر ڈونلڈ ٹرمپ کشمیر ءِ جیڑہ ءَ گیش ءُ گیوار کنگ لوٹیت۔ دگہ جستے ءِ پسو ءَ وفاقی وزیر ءِ اھوالکاری ءَ گوشت کہ بھارت ءَ انگت ءَ پاکستان ءَ آپ ءِ سپلائی بند نہ کتگ ءُ آپ ءِ سپلائی اے وھد ءَ دوشی ءِ وڑ ءَ برجاہ اِنت۔ آئی ءَ گوشت کہ بھارت ءِ گور ءَ آپ ءِ بند کنگ ءِ تکنیکی توانائی نیست انت۔ پہلگام ءِ وئیل ءِ بابت ءَ جست ءُ پرس ءِ سر ءَ وفاقی وزیر ءِ اھوالکاری ءَ گوشت کہ پاکستان ءَ اے غمناکیں وئیل ءِ سر ءَ دلپدردی ءُ ھمدردی ءِ درشانی کتگ ءُ یک شفافیں پٹ ءُ پول ءِ تہ ءَ کمک ءِ پیشکش کتگ، بلے بھارت ءَ پاکستان ءِ سر ءَ بے ھچ ثبوت ءَ الزام جتگ۔ آئی ءَ گوشت کہ تاں انوگ ءَ بھارت یک ھم ثبوت پیش کنگ ءَ سوبین نہ بوتگ ءُ نہ کہ ھچ گل ءَ اے وئیل ءِ ذمہ واری زرتگ۔ عطا اللہ ترار ءَ گیش گْوشتگ کہ مقبوضہ کشمیر ءَ ھپت لکھ ھندی لشکر ءِ ھست بوھگ کہ پہلگام ءِ وئیل ءِ سوب بوتگ، ھندی سیکورٹی ءُ انٹیلی جنس ءِ بدتریں ناکامی اِنت ءُ ھندوستان اے وئیل ءَ گوں پاکستان ءَ ھمگرنچ کنگ ءِ کوشست ءَ سک ناکام بوتگ۔ وفاقی وزیر ءِ اھوالکاری ءَ گوشت کہ جنگ بندی ءَ چہ پد پاکستان ءُ بھارت ءِ ڈی جی ایم اوز آنی نیام ءَ اولی رابطہ کنگ بوتگ۔ وفاقی وزیر ءِ اھوالکاری ءَ یک جُستے ءِ پسو ءَ گوشت کہ پاکستان ناشرکاری ءِ ھلاپ ءَ مزنیں جنگ ءَ کنگ ءَ اِنت ءُ روکپتی سیمسر آنی سر ءَ ناشرکار آنی ھلاپ ءَ موثر آپریشن برجاہ اِنت۔ پاکستان ءَ ناشرکاری ءِ ھلاپ ءَ جنگ ءَ بے گناہیں شہری، سپاھیگ ءُ افسر ءِ جان ندر کتگ۔ آئی ءَ اے گپ پدر کت کہ پاکستان ءَ کجام ھم ناشرکاریں گل ءِ واستہ ایمنیں پناہ گاہ نیست۔ یک جستے ءِ پسو ءَ وزیر ءِ اھوالکاری ءَ گوشت کہ استیں جنگ بندی پاکستان ءِ نزوری نہ انت بلکیں پاکستان ءِ حکمت عملی ءُ سفارتکاری ءِ سوبمندی انت۔ ما ہندوستان ءِ فوجی تنصیبات، سلاہانی ڈپو، ءُ فوجی جاہ نشانگ جوڑ کتگ انت، وھدے کہ ہندوستان ءِ تاوان ءِ دیم ءَ انت۔ آئی ءَ گوشت کہ بھارت اے جاور ءَ نہ اِنت کہ آ کش ءُ چیل ءَ را گیش بہ کنت۔ آئی ءَ گوشت کہ سرجمیں راج پاکستانی قوت آنی ھمراھی ءَ اوشتاتگ، پاکستان ءِ سوبمندی روچ ءِ رنگ ءَ پدّر اِنت۔
