اسلام آباد۔ 13مئی (اے پی پی) قومی اسمبلی نا دیوان اٹی سے شنبے نادے آقومی اسمبلی نا باسک آک بھارتی جارحیت نا برخلاف پاکستان نا فوج انا گچین ومتحد ردعمل نا زبردست لوز آتیٹی ستاءِ کرینو و بھارتی وزیراعظم نریندرمودی ءِ طنزیہ وڑاٹ ’’سرینڈر مودی‘‘ گوندار۔پیپلزپارٹی نا سینئر راہشون حناربانی کھر بھارت نا جارحانہ رویہ نا مذمت ءِ کرسا اودے غیرزموارانہ و جہانی کانود آتیان چپ گوندا۔ اونا پاننگ ئس کہ بھارت عقل آن عاری گام اس ہرفے، ایلو کنڈآ پاکستان زمواری نا درشانی ءِ کرے ولے ننا صبر ءِ نزوری تکنگا۔ اوآرٹیکل 370 نا چٹفنگ آ جہانی برادری نا چپی آ است ہسونی نا درشانی ءِ کرے وپارے کہ امریکی صدر ڈونلڈ ٹرمپ ہم کشمیر نا ویل ءِ متنازعہ امنا کرینے۔ اوخبڑدار کرے کہ دہشت گردی نا برخلاف کارروائی نا پن آ سیم آن ایپار جلہو آتے جواز کننگ خطرناک مریک، اگہ داوڑنا دلیل ءِ امنا کننگاتو پاکستان ہم بھارت اٹی کارروائی تا جواز تننگ کیک ہراڑے ننے بھارتی ریاستی دہشت گردی نا شاہدی دوئی ءِ۔ پیپلزپارٹی نا راہشون عبدالقادرپٹیل پاکستان نا فوج، چیف آف آرمی اسٹاف جنرل سید عاصم منیر و پاک فضائیہ ءِ جیرت مندانہ و متحد ردعمل آ خراج تحسین پیش کرے۔ اوہم مودی ءِ ’’سرینڈر مودی ‘‘ گوندساپارے کہ پاکستان دنیا ءِ نشان تس کہ نن امن خوانہ ولے اگہ جنگ ننے آ مسلط کننگاتو پبی ورندی ایتنہ۔ اوبھارت آ پاکستان اٹ دہشت گردی نا کارروائی تیٹی اوار مننگ نا دوبہ خلک و پاکستان نا جوہری لائخی ءِ شہید ذوالفقار علی بھٹو شہید بینظیر بھٹو نا کوشست آتا بھرم گوندا۔ اوچیئرمین بلاول بھٹو زرداری نا جہانی کہول آ پاکستان نا امن نا کلہو نا ترجمان نا ہم ستاءِ کرے۔ مجلس وحدت المسلمین نا قومی اسمبلی نا باسک حمید حسین بھارتی جلہو آتا برخلاف نن نا تہاری ٹی فوج، سیاسی سرکڑدہ، میڈیا و الس نا یکجہتی نا ستاءِ کرے۔ تحریک انصاف نا اسمبلی نا باسک فضل محمد خان پاکستان نا فوج انا کسبی مہارت و جیرت ءِ خراج تحسین پیش کرسا پارے کہ ننا آرمی، نیوی و ایئر فورس نئے بیرہ ڈیہہ بلکن جہانی کہول آہم تینا لائخی تے پک کرینے۔ جمعیت علمائے اسلام نا راہشون عبدالغفور حیدری پاکستان نا فوج انا ستاءِ کرے و چین و ترکیہ کون آ سنگت ملک آتا منت واری ءِ ہرفے ہرابے چیٹ حالیت آتیٹی پاکستان تون تفیر۔ متحدہ قومی موومنٹ (پاکستان ) نا اسمبلی نا باسک سید وسیم حسین قوم انا یکجہتی و پاکستان نا فوج انا سخت ردعمل نا ستاءِ کرے۔ پیپلزپارٹی نا سحرکامران حکومت نا خارجہ پالیسی تا ستاءِ کرسا پارے کہ ساڑی آ بے چیٹی ٹی بھارت ءِ سفارتی تنیائی تون تروئی تما۔ اوآپریشن’’بنیان مرصوص‘‘ اٹی قومی سیوت نا ہم ستاءِ کرے۔ بنجائی پارلیمانی سیکرٹری گل اصغر خان چین نا مخ تفی آ منت واری ءِ ہرفےو پارے کہ حکومت بھارت ءِ سفارتی کہول آ تنیا کرے، بھارت جہانی کہول آ تنیا رہینگا۔ پیپلزپارٹی نا مرزا اختیار بیگ قوم ءِ مبارکبادی ترساپاکستان نا فوج انا ردعمل ءِ تاریخی لمحہ اس گوندا۔ اوپارے کہ بھار ت ءِ سفارتی پڑآ ہم شکست مس۔ پی پی پی نا ایم این اے مہیش کمار ملانی پارے کہ پاکستان نا فوج بھارتی ڈرون و جہاز آتے خلسا بٹسا فیصلہ کن ردعمل تس۔ اوپارے کہ مچ آ قوم بشمول اقلیت آک بھارتی جارحیت نا برخلاف فوج اتون ہم کوپہ مرسا سلوک ءُ ۔
