ماسکو۔ 13مئی (اے پی پی) چیئرمین سینیٹ سید یوسف رضاگیلانی روسی فیڈریشن نا فیڈریشن کونسل نا چیئرپرسن ویلنٹینا ماٹو یینکو تون اوڑدہی کرے و ہڑتوم آ کنڈآتا تین پہ تینی تعلقداری تے مون آ دننگ، پارلیمانی سفارتکاری ءِ ودفنگ ، امن ، واپار و علاقائی سوگوی، زرگزران و زرکاری نا مون آ دننگ نا عزم انا درشانی ءِ کرے۔ چیئرمین سینیٹ سید یوسف رضاگیلانی تینا شاندار مہمانداری آ روسی سرکڑدہ غاتا منت واری ءِ ہرفسا ہڑتوم آملک آتا تعلقداری تے پین مون آ دننگ نا درشانی ءِ کرے۔ چیئرمین سینیٹ پارے کہ اینو پاکستان و روس انا تعلقداری و تین پہ تینی کمکاری مثبت کنڈآ ہِننگ ءِ ہرانئے بیرہ تین پہ تینی شونہالی بلکن اسہ رکھوک و سوگو ڈیہہ اسے کن ہم بھاز المی ءِ۔ اوزور شاغا کہ داوڑنا بڑزکو کہولی ہن و بر پارلیمانی سفارت کاری ءِ سوگوی تننگ اٹ کمکار مریک و تین پہ تینی سمجھوتہ و کمکاری نا بنداو ءِ سوگو کیک۔ چیئرمین سینیٹ روسی فیڈریشن نا چیئرپرسن و روسی سرکڑدہ غاتے یوم فتح نا 80 می سال دے آ مبارکبادی ہم پیش کرے۔ اوڑدہی ٹی ہڑتوم آ راہشونک پارلیمانی ہن وبر ، علاقائی سلامتی، توانائی نا بشخ اٹی کمکاری، و السی رابطہ غاتا مون آدننگ تون اوار چندی امور تیا سرجمی اٹ گپ وتران کریر۔ ویلنٹینا ماٹویینکوسید یوسف رضاگیلانی ءِ جم وجوش اٹ بخیرکرے و اودے اسہ مدبر سیاستدان و روس انا متکن آ سنگت نا وڑاٹ ستاءِ کرے۔ اوپارے کہ سید یوسف رضاگیلانی نا دور ءِ وزارت عظمیٰ ٹی ہڑتوم آ کنڈآتا تعلقداری سوگو مس و داسہ اونا چیئرمین شپ اٹی دا پوسکن آ بڑزی تےسرمننگ ءُ۔ اوہڑتوم آ پارلیمانی ادارہ غاتا نیام اٹ تین پہ تینی مفاہمتی یات داشت نا رداٹ کمکاری ءِ پین مون آدننگ اٹ است خواہی نا درشانی ءِ کرے۔ اوڑدہی ٹی ہڑتوم آملک آتا نیام اٹ پارلیمانی سفارتکاری نا اسٹریٹجک اہمیت، خاص کر ہندن ءُ وخت اسے ٹی ہراتم جیوپولیٹیکل بے چیٹی ودنگ ءِ، آ زور شاغنگا۔ چیئرمین سینیٹ سید یوسف رضاگیلانی پارے کہ سوگو بین الپارلیمانی رابطہ ہمو ڈیہہ تیٹی سوگوی اتنگ کیک ہرا بے چیٹی نا گواچی ءُ ہرافتے ٹی اوغانستان و سویلی ایشیاہم اوار ءُ۔ اوپارے کہ پاکستان سویلی ایشیاٹی امن، سوگوی و کانود نا حکمرانی کن سنبرینگوک ءِ و غٹ جھیڑہ، بشمول کشمیر نا ویل، انا ایسری کن مدام مذاکرات و سفارتی وڑتا مخ تف مسنے۔ اوداہیت آ ہم زور شاغا کہ پاکستان پرامن بقائے تین پہ تینی و علاقائی کمکاری نا اصول آتیا پورو یخین تخک و پاکستان اشتعال انگیزی و سیکورٹی گڑتی تیان پد ہم مدام سگ انا درشانی ءِ کرے و جنگ و جھیڑہ نا جاگہ غا بے چیٹی ٹی کمتی و تعمیری گپ وتران ءِ ویل آتا ایسرکن اولیت تسنے۔ علاقائی منظرنامہ غا ہیت کرسا چیئرمین سینیٹ پارے کہ لکھ آ بے گناہ تے جنگ اٹی بِٹنگ نا جاگہ غا مکالمہ نا کمک اٹ باندات آتےبایدے مون آدننگے۔ پاکستان بے بنداو دوبہ غاتے یکسر مسترد کرینے وبھارت نا غیرکانودی کوزہ ٹی جموں وکشمیر اٹی ساڑی آ بھارتی بے بنداو دوبہ غاتیا آجوجاست وپاست نا خواست کرینے و اسہ کنڈی گام گیج کون آ سندھ طاس معاہدہ نا معطلی نا مذمت ءِ کرینے۔ اوروس آ زور شاغا کہ او پاکستان و بھارت نا نیام اٹ امن نا مون آدننگ اٹ فعال کڑداداکے اوپیدوار کرے کہ پاکستان شاہدی تا فراوانی و واقعہ نا آجوجاست وپاست نا باقاعدہ سلاہ تس تانکہ جنگ ءِ تہوتننگ نا جاگہ غا انصاف مرے۔ اومستی پارے کہ سندھ طاس معاہدہ نا اسہ کنڈی معطلی پت و جہانی معاہدہ نا خلاف ورزی ءِ ، ہراکہ ڈیہہ انا آبی رکھ ءِ خطرہ ٹی شاغک و اصل ویل یعنی کشمیر آن چکار ءِ اسہ کنڈ کننگ نا کوشست ءِ۔ او داموقف آ زور شاغا کہ ملک اسے نا گل زمین ءِ ایلو ملک انا برخلاف دہشت گردی کن کاریم اٹ بایدے اتنگپ۔ اوپارے کہ اسہ زموار جہانی واک و پاکستان نا متکن آ سنگت نا حیثیت اٹ او پاکستان وبھرت نا نیام اٹ مذاکرات کن متحرک کڑد اداکے۔ ویلنٹینا ماٹویینکو پارے کہ روس پاکستان و بھارت نا نیام اٹ مذاکرات اٹی کمکاری کن تیار ءِ۔ چیئرمین سینیٹ علاقائی امن نا ٹہیفنگ اٹ پارلیمانی سفارت کاری نا اہمیت ءِ تالان کرے و فرینڈ شپ گروپ نا سرجزآتیٹی ترندی اتنگ آ زور شاغا۔ اوڑدہی ٹی فیڈریشن کونسل نا نائب چیئرمین کالسٹنٹین کوسا چیف، سینیٹ آف پاکستان و فیڈریشن کونسل نا نیام اٹ کمکاری نا گروپ نا سروک ولادیمیرچیز ہوف، روس اٹی پاکستان نا سفیر خالد محمد جمالی و چیئرمین سینیٹ نا مالیاتی سلاہکار اعزازخان ئسک ہم ساڑی ئسر۔
