اسلام آباد۔ 13مئی (اے پی پی) بنجائی وزیر ڈٹ بندی، شونداری و خصوصی گام گیج پروفیسر احسن اقبال نا کماشی ٹی ’’اڑان پاکستان‘‘ اولیتی ڈٹ جات مالی سال 2025-26آ اہم دیوان اس اڈہلک۔ دیوان اٹی سیکرٹری ڈٹ بندی اویس منظور سمرا، چیف اکانومسٹ ڈاکٹر امتیاز احمد، جوائنٹ چیف اکانومسٹ راجہ مشتاق، پلاننگ کمیشن نا باسک و تعلقدا ر وزارت آتا بڑزکو کمامدارآک بشخ ہلکر۔ دیوان اٹی برآمدات، ماس میڈیا، راجی بشخ، خور وکشت وکشار، چاگڑد، سائنس و ٹیکنالوجی و انفراسٹرکچر نا بابت چندی ڈٹ آتا جاچ ءِ ہلنگا۔ بنجائی وزیر پارت کرے کہ پی ایس ڈی پی (پبلک سیکٹر ڈیولپمنٹ پروگرام) اٹی ہموفتے اوار کننگے ہرا ادارہ جاتی کارکڑدءِ گچین کیر و قومی شونداری نا ہدف آتون ہم گرنچ مریر۔ اوپارے کہ فنڈآتا گچین بشخنگ کن ڈٹ آتا ریشنلائزیشن (عقلمندانہ درجہ بندی) المی ءِ۔ احسن اقبال زور شاغا کہ ڈٹ جات نا جہانی تزویراتی اہمیت ءِ ہم مون آتخنگے۔ اونیشنل سینٹر فار برانڈ ڈویلپمنٹ ءِ دمدستی وڑاٹ فعال کننگ و علامہ اقبال نیشنل اکیڈمی نا پوروی سی ڈی اے نا شریداری اٹ پک کننگ ناپارت کرے۔ دارداٹ اوپڑوکرے کہ علامہ قبال نا 150 می سال دے انا وخت آ ’’اقبال مونومنٹ‘‘ و اکیڈمی نا باقاعدہ بناءِ کننگک۔ وزیر ڈٹ بندی وزارت جان جوڑی نا اولیتی ڈٹ آتے ہم پی ایس ڈی ایف نا بشخ کننگ ناپارت کرے و پاور سیکٹراٹی برجاڈٹ آتا تسلسل تون اوار اوار پوسکن آ ڈٹ آتیا غور انا اہمیت آ زور شاغا۔ اوبلوچستان اٹی السی آسودہی آ تالان آب اٹ ڈٹ آتے اولیت تننگ نا پارت کرے۔ احسن اقبال بے نظیر انکم سپورٹ پروگرام اٹی جوان اصلاحات نا گرج آ زور شاغا تانکہ الس ءِ سکل بیسڈ ڈٹ آتا کمک اٹ خودکفالت نا کنڈآ دننگ مرے۔ اوپارے کہ بیرہ مالی امداد آ سیبو ویل آتا ایسر اف۔ اوپارے کہ زیات آن زیات ڈٹ پبلک پرائیویٹ پارٹنر شپ نا رداٹ بناءِ کننگے، و پی سی ۔ون نا منظوری ٹی تاخیر ءِ ناقابل قبول گوندسا تعلقدار وزارت آتے دمدستی کارروائی نا پارت کرے۔ وزیر ڈٹ بندی پارے کہ ’’اڑان پاکستان‘‘نا ہدف آتون ہم گرنچ ڈٹ آتے ہی اولیت تننگے، و گلگت بلتستان اٹی میڈیکل کالج نا جوڑ کننگ تون اوار اوار تعلیم وسیل و سوات نا مون آ دننگ کن ہم جوان ڈٹ آتا بناءِ کننگے۔
