اسلام آباد۔ 13مئی (اے پی پی) وزیراعظم محمد شہباز شریف پارت کرینے کہ خراج دُزی کروک آ بندغ و بشخ آتا برخلاف پبی کارروائی کننگے، خراج دُز آتا کمکاری ءِ کروک آ آفیسر و کارندہ غاتا ہم سخت احتساب ءِ کننگے، خراج دُزی نا توننگ کن پوسکن آ ٹیکنالوجی ءِ کاریم اٹ اتنگے۔ سے شنبے نادے آ وزیراعظم آفس نا میڈیا ونگ آن جاری بیان نا رداٹ وزیراعظم محمد شہباز شریف نا کماشی ٹی ایف بی آر نا خراج نا دنگ ءِ ودفنگ و خراج کٹیا ٹی ودکی آ جاچ دیوان اس مس۔ داوخت آ وزیراعظم برجامالی سال اٹی ایف بی آر نا کٹیا نا ہدف آتا دوئی کننگ نا کنڈآ ترندی اٹ ہِننگ آ حکومتی زرگزرانی ٹیم انا کوشست آتا ستاءِ کرسا پارے کہ ہمو بندغ و بشخ آک ہرا خراج تننگ نا استعداد تخرہ و خراج تفسہ، اوفتے خراج نیٹ اٹ اتنگے۔ وزیراعظم پارت کرے کہ خراج دُزی کروک آ بندغ و بشخ آتا برخلاف پبی کارروائی کننگے، خراج دُز آتا کمکاری ءِ کروک آ آفیسر و کارندہ غاتا ہم سخت احتساب ءِ کننگے، خراج دُزی نا توننگ کن پوسکن آ ٹیکنالوجی ءِ کاریم اٹ اتنگے۔ وزیراعظم پارے کہ خراج نیٹ اٹی ودکی حکومت نا اولیت ءِ، خراج نا کچ ءِ کم کرسا لس بندغ آ بھاریم ءِ کم کننگ خوانہ۔ وزیراعظم پارت کرے کہ سرمٹ و ایلو بشخ آتیٹی ڈیجیٹل مانیٹرنگ ءِ برجاسال جون اسکان پورو کننگے، تمباکو نا بشخ اٹی خراج کٹیانا دوئی کنننگ کن صوبہ غاتون اواری اٹ گام گیج آتے ترند کننگے، خراج نا بابت پدتموک مقدمہ غاتا گچین وڑاٹ پیروی ءِ کرسا ملک و قوم انا پیسہ غاتا دوئی کننگ ءِ پک کننگے۔ اوپارے کہ اللہ نا فضل وکرم اٹ ملکی زرگزران سوگو و شونداری نا کنڈآ ہِننگ ءِ، ملکی شونداری کن غٹ ءِ تینا زمواری تے پورو کروئی مریک۔ دیوان ءِ پاننگاکہ مچ آملک اٹی سرمٹ پلانٹ آتیٹی ٹریک اینڈ ٹریس سسٹم نا پورو نفاذ آن خراج کٹیا ٹی ارب آ روپئی نا ودکی ممکن مس۔ دیوان ءِ مستی پاننگاکہ بورہ نا صنعت اٹی دا نظام نا نفاذ آن نومبر 2024آن اپریل 2025 اسکان خراج کٹیا ٹی 35 درسد نا ودکی مس۔ دیوان ءِ پاننگاکہ وزیراعظم نا کماشی ٹی ایف بی آر اصلاحات نا سوب خراج کٹیا نا جی ڈی پی نا10 ٹک 6 درسد نا ہدف ءِ دوئی کننگک۔ دیوان اٹی بنجائی وزیر اعظم نذیر تارڑ، محمد اورنگزیب، احدخان چیمہ، عطاء اللہ تارڑ، چیئرمین ایف بی آر و تعلقدار بڑزکو کمامدارآک بشخ ہلکر۔
