اسلام آباد۔ 13مئی (اے پی پی) صدر مملکت آصف علی زرداری پاکستان آ بلااشتعال بھارتی جلہو آتیٹی شہید مروک آتے خراج عقیدت پیش کرساپارینے کہ ملکی سلامتی نا خاطر جون تے ندر کننگ آ مچ آ قوم پاک فوج و پاک فضائیہ نا بہادر گلزادہ غاتے سلام پیش کیک، ملکی سلامتی و وتواجہی آ مروک آ ہر جلہو نا پبی ورندی ءِ ایتنہ۔ سے شنبے نادے آایوان ءِ صدر نا پریس ونگ آن جاری بیان نا رداٹ صدر مملکت پارے کہ نن تینا شہید آتا قربانی تیا گمر کینہ، پاکستانی قوم و سلہہ بند فوج بھارتی جارحیت نا برخلاف سوگو ءُ دیوال اسے آنبار سلوک ئسر۔ اوپارے کہ ننا بہادر فوج قوم و ملکی سالمیت نا سرسہبی اٹ دفاع ءِ کرے، آپریشن ’’بنیان مرصوص‘‘ آن ننا بہادر فوج دشمن نا غرور ءِ مش تا کرے۔ صدر مملکت پارے کہ بھارتی صریح جارحیت مچ آپاکستانی قوم ءِ پین یکجا و سوگو کرینے، پاکستانی قوم و اونا بہادر فوج ہرجارحیت نا ورندی ءِ تننگ کن ہروخت تیار ءُ۔ صدر مملکت بھارتی جلہو آتیٹی چناو زالبول آتون اوار نہادی جونی نسخان تیا ڈکھیائی و رنج انا درشانی ءِ کرے۔ اوزوال کروک آ بندغ آتا خاہوت آتون ہڑزخواہی نا درشانی و اوفتے کن صبر وجمیل نا دعا۔ صدر مملکت ٹھپی تیکن زوت دراخ جوڑی کن ہم دعاکرے۔
